Արարատի և Վայոց ձորի մարզերի ընդհանուր իրավասության դատարանը` նախագահությամբ Արմեն Բեկթաշյանի, այսօր` հունվարի 11-ին, պետք է լսի Արարատի զորամասերից մեկի նախկին հրամանատար, ՀՀ ԶՈՒ գլխավոր շտաբի պետ Յուրա Խաչատուրովի որդու` Գրիշա Խաչատուրովի ցուցմունքը: Խոսքը նրա ղեկավարած զորամասի պայմանագրային զինծառայող, լեյտենանտ, մարտական հենակետը լքելու, պետության համար վտանգ ստեղծելու մեջ մեղադրվող Նարեկ Այվազյանի և նրան ծեծող ժամկետային զինծառայողների դեմ հարուցված քրեական գործի մասին է: Առայժմ նշենք, որ դատավոր Ա.Բեկթաշյանը Նարեկ Այվազյանի պաշտպանի պահանջով դատական նիստերը մինչ այժմ անցկացրել է Արտաշատ քաղաքում, որտեղ դատական նիստերը ձայնագրառելու համապատասխան սարքեր կան, սակայն երբ հերթը հասել է զորամասի պատասխանատուների ցուցմունքը լսելուն, դատավորը դատական նիստը տեղափոխել է Վեդու նստավայր, որտեղ չկա ձայնագրառելու հնարավորություն: Այսինքն` եթե նույնիսկ զորամասի պատասխանատուներն իրենց անգործությունը կամ հանցավոր գործունեությունը հավաստող ցուցմունքներ տան, շատ հանգիստ հնարավոր կլինի դրանք փոխել: Սույն գործի մանրամասներին մենք առաջիկայում կանդրադառնանք: Միայն հիշեցնենք, որ սա այն զորամասն է, որի գումարտակի հրամանատար, «Ռոժ» մականունով Վարդան Մարտիրոսյանը և նրա համախոհ, նույն զորամասի գնդի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Արթուր Կարապետյանը կասկածվում են պայմանագրային զինծառայողներից գումարներ հավաքելու մեջ: Հենց վերջինս է Նարեկի գլուխը խփել պատին, երբ նրանից «ԱԿԲԱ-ԿՐԵԴԻՏ ԱԳՐԻԿՈԼ» բանկից 500.000 դրամ վարկ վերցնելու մերժում է ստացել: