Հրազդանի Լեռնանիստ գյուղում հունվարի 10-ի առավոտյան անհաշտ ամուսինների միջև ծագած հերթական վեճն այս անգամ բարի ավարտ չունեցավ: Լեռնանիստի բնակիչ 59-ամյա Աշոտ Գրիգորյանը կնոջ հետ վիճելուց և միմյանց ծեծելուց հետո ինքնասպանություն է գործել: Հունվարի 10-ի առավոտյան` ժամը 10:30-ի սահմաններում, ոստիկանության Կոտայքի մարզային վարչությանը Լեռնանիստ գյուղի գյուղապետից ահազանգ է ստացվում, որ նշված գյուղի իր տանը ինքնասպան է եղել գյուղի բնակիչ Աշոտ Գրիգորյանը: Դեպքի վայր մեկնած օպերատիվ քննչական խումբը պարզում է, որ Գրիգորյանը միջանցքի առաստաղից կախվելու միջոցով է ինքնասպանություն գործել: Սակայն դատաբժիշկը դիակի փորձաքննությունից հետո տվել է նախնական եզրակացություն, համաձայն որի` դիակի վրա առկա են եղել բռնության հետքեր: Նշենք, որ նույն տարածքում հայտնաբերվել են նաև արյան հետքեր ու կանացի ականջօղեր: Իսկ որ ամենահետաքրքիրն է` ոստիկանություն է տարվել նաև մահացած Աշոտ Գրիգորյանի կինը՝ Աիդան, ում վրա ևս, ըստ գյուղի բնակիչների, հայտնաբերվել են մարմնական վնասվածքներ ու բռնության հետքեր: Մահացածի կինը ոստիկանությունում պատմել է, որ ամուսնու հետ ծանր վեճ են ունեցել, փոխադարձ ծեծկռտուք, հետո ծանր հոգեբանական վիճակում ամուսինը ինքնասպան է եղել:
Ոստիկանության քննչական գլխավոր վարչության Կոտայքի մարզի քննչական բաժնում նյութեր են նախապատրաստվում: Նախնական տեղեկություններով, Աշոտ Գրիգորյանի մահն ինքնասպանության արդյունք է, սակայն ՀՀ Քրեական օրենսգրքի 110 հոդվածի 1-ին մասի հատկանիշներով հարուցվել է քրեական գործ, հանգամանքները պարզվում են, կատարվում է նախաքննություն:
Ի դեպ, բակում լվացքի պարանից կախված է եղել մի գրություն, որը քննչական մարմինն առգրավել է. գրությունը Աշոտ Գրիգորյանինն է եղել` հետևյալ բովանդակությամբ. «Աստված ջան, կներես , երեխաներիս լավ կպահես»:
