Ինչպես հայտնում է Reuters գործակալությունը, համաշխարհային խոշորագույն քիմիական DuPont ընկերությունը հունվարի 9-ի երեկոյան հայտարարել է, որ 5,8 մլրդ դոլարով կգնի դանիական կենսամթերք արտադրող Danisco-ն:
Գործարքն ամերիկացիներին թույլ կտա դուրս գալ նոր` սննդային հավելումների շուկա, որտեղ հիմա ԱՄՆ-ում առաջնային դիրք ունի International Flavors and Fragrances ընկերությունը:
Danisco-ի բաժնետերերի համար սա արդյունավետ գործարք է, քանի որ ամերիկացիներն ամեն ակցիայի համար դանիացիներին առաջարկել են 665 դանիական կրոն: Դա 25 տոկոսով բարձր է, քան այդ ակցիաներն արժեին հունվարի սկզբին արժեթղթերի շուկայում: Հունվարի 10-ի առավոտյան, ըստ Կոպենհագենի արժեթղթերի շուկայի տվյալների, դրանք արդեն թանկացել էին 26 տոկոսով:
Danisco-ն համարվում է Դանիայի խոշորագույն ընկերություններից մեկը: Այն հիմնադրվել է 1989 թ.-ին Danish Sugar, Danish Distillers և Dansk Handels-og Industri ընկերությունների միաձուլմամբ, որը Դանիայի պատմության մեջ դարձավ ամենամեծ միաձուլումը:
Ինչ վերաբերում է DuPont-ին, ապա այդ ընկերությունը ստեղծվել է 1802 թ.-ին: 2009 թ.-ին DuPont-ը աշխարհի ամենամեծ քիմիական ընկերությունների շարքում երրորդն էր` եթե հաշվենք շուկայական կապիտալիզացիան և 9-րդը` տարեկան շահույթով: DuPont-ի կապիտալիզացիան 2010 թ.-ի սկզբին կազմում էր 45 մլրդ դոլար: