Գյումրու «Շիրակ»-ի պաշտոնական կայքը տեղեկացնում է, որ թիմը վերադարձավ իր երրորդ ուսումնամարզական հավաքից, որն անցկացնում էր Անթալիայում: Այսօր ակումբի պաշտոնական կայքի հետ զրույցում «Շիրակ»-ի գլխավոր մարզիչ Վարդան Բիչախչյանն ասաց, որ ընդհանուր առմամբ գոհ է հավաքից:
– Երրորդ հավաքը մեզ մոտ խաղային ստացվեց: Երկու շաբաթվա ընթացքում անցկացրինք ստուգողական 4 հանդիպում: Արդեն նշել էի, որ թիմի մոտ զգացվում է խաղային կայունություն, պետք է աշխատել հարձակման եզրափակիչ փուլը լավացնելու վրա: Այս պահի դրությամբ տղաների խաղամակարդակից ընդհանուր առմամբ գոհ եմ, բավարարում է նաև ֆիզիկական վիճակը: Ինչ նախատեսել էինք, կարողացանք իրագործել: Եղանակն էլ բարենպաստ գտնվեց մեր հանդեպ:
– Վերջին հանդիպման ընթացքում մի քանի ֆուտբոլիստներ վնասվածքներ էին ստացել…
– Այո, վերջին հանդիպման ընթացքում մի քանի կորուստ ունեցանք: Մեր լեգեոներները՝ Բորիսը և Բեկոն, թեթև վնասվածքներ ստացան, նրանք երկուսն էլ ձգել էին մկանները: Ես դա կապում եմ այն փաստի հետ, որ մինչև մեզ միանալը նրանք այդքան էլ լավ մարզավիճակում չէին: Սակայն համոզված եմ, որ մինչև Հայաստանի Գավաթի խաղարկության կիսաեզրափակիչ առաջին հանդիպումը նրանք լիովին կապաքինվեն և կկարողանան մեզ օգնել:
– Ովքե՞ր են լեգեոներներից մնալու թիմում:
– Մենք այս պահի դրությամբ հրաժարվել ենք ֆրանսիացի հարձակվող Ժան-Լուի Բերնից, նա վերադարձել է Լիոն, սակայն վերջնական որոշում դեռ կայացված չէ: Մեզ հետ Գյումրի են վերադարձել Դիդյե Բորիսը, Ֆուֆանա Բեկոն և Դիոպ Դամը: Ինչպես գիտեք, Լի Լամին Յորոն ակումբի հետ գործող պայմանագիր ունի:
– Դիոպ Դամը մեկ շաբաթ առաջ է միացել թիմին: Ի՞նչ կասեք նրա մասին:
– Դիոպ Դամը սենեգալցի է, 19 տարեկան է: Հանդես է գալիս երկու դիրքերում՝ ենթահարձակվողի և կենտրոնական կիսապաշտպանի: Նրա իրավունքները պատկանում են «Խիմկի»-ին, մեզ մոտ նա, հավանաբար, հանդես կգա վարձավճարով: Չհասցրինք կարծիք կազմել նրա մասին, քանի որ առաջին մարզման ժամանակ վնասվածք ստացավ: Իսկ ընդհանուր առմամբ տպավորությունը դրական է:
– Ի՞նչ եք նախատեսում անել մինչ գավաթի կիսաեզրափակիչ առաջին հանդիպումը:
– Երեք օրվա հանգստից հետո, նախատեսել ենք չորրորդ ուսումնամարզական հավաքը, որն, ամենայն հավանականությամբ, կանցկացնենք Ավանի ֆուտբոլի ակադեմիայում: Ինչպես նաև վերջին հավաքի ժամանակ նախատեսում ենք ստուգողական 2 հանդիպում: Եվ դրանից հետո արդեն պատրաստվելու ենք մարտի 18-ին «Միկա»-ի հետ հանդիպմանը:
