Սիրիայում արդեն հրապարակվել են սահմանադրական հանրաքվեի մասնակցության նախնական թվերը, սակայն հայտնի է, որ ընդդիմությունը բոյկոտել է քվեարկությունը, իսկ արևմտյան և արաբական քաղաքական գործիչները դրանք որակել են ոչ լեգիտիմ: Ինչպես գրում է Kommersant-ը՝ իրավիճակը փակուղային է, որից դուրս գալուն, շատ դիվանագետների կարծիքով, կօգնի ՌԴ-ի միջնորդությունը:
Ռուսաստանի մասին, կապված Սիրիայի խնդրի հետ, ըստ Kommersant-ի՝ սկսում են ավելի հաճախ հիշել: Ռուսաստանում ԱՄՆ դեսպան Մայքլ Մակֆոլը երեկ Twitter-ի իր միկրոբլոգում գրել է. «Հոմսը գտնվում է խոշոր հումանիտար աղետի շեմին: Ռուսաստանը պետք է շտապ դիմի Ասադին ու նրանից պահանջի կրակի 24-ժամյա դադարեցում»:
Իսկ մինչ այդ Թունիսում «Սիրիայի բարեկամներ»-ի համաժողովի ժամանակ հնչել էր առաջարկ` Ասադին ու նրա ընտանիքին քաղաքական ապաստան տրամադրել Մոսկվայում: Այդ մասին հայտարարել էր հանդիպման տանտերը` Թունիսի ժամանակավոր նախագահ Մոնսեֆ Մարզուկին: «Պետք է որոնել քաղաքական որոշում: Մենք տեսնում ենք Եմենի իրադարձությունների սցենարի հնարավոր զարգացում` Սիրայի նախագահին ու նրա ընտանիքին ապահովել անձեռնմխելիությամբ: Իսկ ապաստան կարող է նրան տրամադրել Ռուսաստանը»,- ասել է նա:
Մեկնաբանելով թունիսյան համաժողովի արդյունքները` փորձագետները եկել են եզրակացության, որ Ասադի դեմ հանդես եկող պետությունների թվում հստակ երևում է երկու ճամբար` Պարսից ծոցի միապետություններն ու արևմտյան երկրները, որոնք առայժմ նախընտրում են պատժամիջոցների ուղին, դիվանագիտական անուղղակի ճնշումները: Համոզվելով, որ համաժողովի մասնակիցների մեծ մասը չի կիսում իր կոշտ դիրքորոշումը, Սաուդյան Արաբիայի պատվիրակությունը լքել է ֆորումը:
Ասադի ևս մեկ անհաշտ մրցակից` Կատարի արտգործնախարար Համադ բեմ Ջասիմ Ալ-Թանինը, չի դիմել դեմարշի, միայն առաջարկել է Սիրա ուղարկել արաբական զորքեր, որոնք պետք է վերջ տան արյունահեղությանը: Նա սակայն չի մանրամասնել, թե ինչպես է պստկերացնում այդ օպերացիան` հաշվի առնելով այն, որ պաշտոնական Դամասկոսը կտրականապես դեմ է դրան:
Ծովային կամ օդային դեսանտ իջեցնել ոչ մի արաբական երկիր ի վիճակի չէ, իսկ Հորդանանի կամ Իրաքի տարածքից եգիպական կամ սաուդյան դիվիզիաների երթը դժվար է պատկերացնել:
Այդ ամենը բարձրացնում է Ռուսաստանի պոտենցիալ խաղադրույքը,- գրում է հոդվածագիրը,- սակայն Ռուսաստանը փորձում է առայժմ զերծ մնալ որևէ նախաձեռնությունից:
