«Այս նախագական քարոզարշավը կարող է լինել ամենակեղտոտը պատմության մեջ»: Ամերիկյան քաղաքական բառապաշարում ամուր հիմքեր ունեցող այս արտահայտությունը դարձյալ սկսել են կրկնել մի շարք փորձագետներ՝ վերլուծելով Հանրապետական կուսակցության հավանական թեկնածուների քարոզչական տեսանյութերը:
Ինչպես հաղորդում է ITAR-TASS-ը, թեկնածուների շրջանում վառ արտահայտված ֆավորիտի բացակայությունը հանգեցրել է ընդդիմության ներսում պայքարի սրմանը, ինչը ձեռնտու է Սպիտակ տան ղեկավար Բարաք Օբամային:
Նշվում է, որ «մեծ հին կուսակցության» թեկնածուները նոյեմբերյան ընտրություններին կմրցեն ոչ միայն դեմոկրատ նախագահի, այլև միմյանց հետ:
Kantar Media ընկերության տվյալներով, որը զբաղվում է հեռուստագովազդի նախընտրական մոնիտորիգով, 4 հանրապետական թեկնածուների նախընտրական շտաբների պատրաստած տեսահոլովակների ավելի քան 50%-ը կրում է «բացասական բնույթ»: Այլ խոսքերով՝ դրանցում պարունակվում է քննադատություն նախագահական պայքարի մյուս թեկնածուների հասցեին:
Հատկապես աչքի է ընկնում Մասաչուսեթսի նախկին նահանգապետ Միթ Ռոմնիի քարոզարշավը: Նշվում է, որ ամենահարուստ հանրապետական թեկնածուն իր միջոցների երկու երրորդը ծախսում է «բացասական բնույթի» տեսանյութերի համար: Նման բնույթ են կրում նաև մյուս հանրապետական թեկնածուների տեսահլովակները:
Gallup սոցիալական հետազոտությունների ծառայության և USA Today թերթի անցկացրած հարցումների համաձայն՝ եթե նախագահական ընտրությունները տեղի ունենան վաղը, ապա Օբամայի հետ մրցակցելու հավասար հնարավորություններ ունեն և Միթ Ռոմնին, և Ռիք Սանտորումը:
Հերթական պրայմերիզը տեղի կունենա փետրվարի 28-ին Արիզոնա և Միչիգան նահանգներում: Իսկ վճռական փուլը հանրապետական թեկնածուների համար կարող է լինել «սուպերերեքշաբթին»՝ մարտի 6-ը, երբ ընտրություններ և կուսակցական ակտիվիստների հավաքներ կանցկացվեն միանգամից 11 նահանգներում:
