Մարդկային զարգացման միջազգային կենտրոնի գործադիր տնօրեն, փորձագետ Թևան Պողոսյանը դրական է գնահատում փաստը, որ ԵՄ Առևտրային քաղաքականության հանձնաժողովը միաձայն որոշում է կայացրել Հայաստանի հետ Խորը և համապարփակ ազատ առևտրի գոտու ստեղծման շուրջ բանակցություններ սկսել: Այս մասին նա ասաց «Առաջին լրատվական»-ի հետ զրույցում:
Հարցին՝ որքանո՞վ է այս ծրագիրն ուղղված Ռուսաստանի դեմ, նա նշեց, որ կասկածում է՝ նախագիծը կոնկրետ երկրի դեմ աշխատի: «Ծրագիրն ի նպաստ Հայաստան-ԵՄ առևտրային հարաբերությունների բարելավման և առավել ջերմ համագործակցության է: Այն ոչ ոքի դեմ ուղղված չէ և կօգնի, որ Հայաստանը Եվրոպայի հետ իր կապերը բարելավի, հայ գործարարները կարողանան իրենց արտադրանքն ավելի ազատ արտահանել Եվրոպա և հակառակը: Բացի այդ, Խորը և համապարփակ ազատ առևտրի գոտու ստեղծման ծրագիրը կբերի առևտրի ավելի քաղաքակիրթ պայմանների, և բիզնեսի դաշտում արդար ու ազնիվ մրցակցության: Այսինքն՝ միայն և միայն դրականը պետք է նկատել այս ծրագրում»,- ասաց Թևան Պողոսյանը:
Անդրադառնալով թեմային, թե որքա՞ն ժամանակում Հայաստանն ընդունակ կլինի լիարժեքորեն ներգրավվել ծրագրին, փորձագետը նկատեց, որ դա մեծապես կախված է հենց մեր երկրի ներդրած ջանքերից: «Պետք է հասկանալ, որ բանակցություններն արդեն մեկնարկում են, դրանց զուգահեռ՝ Հայաստանին բարեփոխումների փաթեթ է առաջարկվելու: Թե երբ այդ փաթեթը լիարժեքորեն կընդունվի և կգործարկվի, ոչ ոք չի կարող ասել, այդ շրջանը կարող է տևել գուցե 3, 5 կամ 10 տարի: Կոնկրետ ժամկետներ դժվար է կանխորոշել, սակայն բոլոր գնահատականներից դատելով՝ Հայաստանը կարողացել է շատ կարճ ժամանակում կատարել բոլոր նախապայմանները, և եթե ամեն բան նույն տեմպերով ընթանա, ծրագրի գործարկման ժամկետներն այնքան էլ երկար չեն տևի»,- ասաց Մարդկային զարգացման միջազգային կենտրոնի գործադիր տնօրենը:
Ամփոփելով՝ Պողոսյանը նկատեց, որ ԵՄ հետ Խորը և համապարփակ ազատ առևտրի գոտու ստեղծման ծրագրի իրականացումը Հայաստանին հնարավորություն կտա ԵՄ հետ առավել բարիդրացիական, խորը հարաբերություններ հաստատել:
Նշենք, որ ԵՄ Առևտրային քաղաքականության հանձնաժողովը միաձայն որոշում է կայացրել Հայաստանի հետ Խորը և համապարփակ ազատ առևտրի գոտու ստեղծման շուրջ բանակցություններ սկսել: ԽՀԱԱԳ ստեղծմամբ Հայաստանը հնարավորություն կունենա առավել բարենպաստ պայմաններով մուտք գործել մոտ 500 միլիոն սպառող ունեցող Եվրոպական միասնական շուկա: Ներկայումս Հայաստանն օգտվում է ԵՄ կողմից շնորհված Արտոնությունների ընդհանրացված համակարգից (GSP+), որը հնարավորություն է տալիս ապրանքների արտահանում ԵՄ մաքսատուրքի նվազեցված դրույքաչափերով:
