Եգիպտացի մի քանի ոստիկան ազատվել են ծառայությունից մորուք պահելու կանոնները խախտելու պատճառով: Այս մասին հաղորդում է ITAR-TASS-ը` հղում անելով տեղական ԶԼՄ-ներին:
Վերջին շրջանում այսպիսի դեպք էր գրանցվել Շարկիյա նահանգում:
Եգիպտոսի ներքին գործերի նախարարության հրամանով Մուհամմեդ Սեյիսը մեկ ամիս ժամկետով ուղարկվել է «հարկադիր արձակուրդի», իսկ նրա նկատմամբ սկսվել է ծառայողական հետաքննություն մորուքի պատճառով:
Գերատեսչությունն արդեն զգուշացրել է, որ այն ոստիկանները, ովքեր չեն ցանկանա սափրել մորուքը, կարժանանան Սեյիդի ճակատագրին:
Երկրի ներքին գործերի նախարար Մուհամմեդ Իբրահիմ Յուսեֆը հայտարարել է, որ այդ միտումը խստորեն գործելու է նաև պաշտոնատար անձանց նկատմամբ, որոնց նկատմամբ սկսված հետաքննչական գործերը կքննվեն ՆԳ նախարարության կարգապահական կոմիտում: Վերջինս շեշտել է, որ ոստիկանական օրենքի համաձայն` մարդը, ով ոտք է դնում ոստիկանական ակադեմիա, պարտավոր է ունենալ կոկիկ տեսք, այդ թվում` պետք է կանոնավոր սափրվի:
Այդուհանդերձ, ուժայինները չեն պատրաստվում հեշտությամբ հանձնվել` հիմնվելով «սահմանադրական իրավունքի» և այն բանի վրա, որ ոչ մի օրենքով չի արգելվում մորուք պահել:
Facebook սոցցանցում անգամ մի քանի սպաների կողմից ստեղծվել է «Ես մորուքավոր ոստիկան եմ» խումբը, որը մտադիր է պաշտպանել մորուք պահելու իր իրավունքը:
Նախարարությունում արդեն անհանգստանում են, որ «մորուքավորները» կարող են օգնության համար դիմել խորհրդարանին, որտեղ վերջին ընտրությունների հետևանքով մեծամասնություն են կազմում իսլամիստները:
Մորուք պահելը իսլամում համարվում է «աստվածահաճո գործ», և, ինչպես պատգամել է Մուհամեդ մարգարեն, բոլոր մուսուլման տղամարդիկ պարտավոր են մորուք պահել:
