Աշոտը, ինչպես և հազարավոր արցախցիներ, ապրում է հետպատերազմյան Արցախում` շոշափելիորեն զգալով այն ամենը, ինչը հատուկ է նման ժամանակաշրջանին` գործազրկություն, դժվար ճարվող օրվա հաց, երկար, միանման օրեր և հիշողություններ… Հիշողություններ, որ ապրում են իրենց առանձին կյանքով: Նրա խաղաղ, միապաղաղ կյանքի ընթացքը խաթարում է վաղեմի ընկերոջից` Մուսայից, ստացած մի նամակ: Խորհրդային բանակում ծառայելու ժամանակ նա փրկել էր Մուսայի կյանքը ու այդ օրվանից դարձել էին ընկերներ: Աշոտը շատ է ուրախանում նամակով, սակայն կինը դեմ է, որ ամուսինը պատասխանի «թուրքի» նամակին, ինչի համար պատճառ ունի. ազերիները մի գիշերվա մեջ կոտորել են նրա եղբոր ամբողջ ընտանիքը, եղբորն էլ 5 ամիս պահել գերության մեջ` ենթարկելով անմարդկային տանջանքների: Այսպես են սկսվում «Թեկուզ» պայմանական վերնագրով ֆիլմի գործողությունները:
Ֆիլմը Արցախյան ազատագրական պայքարի մասին է, փաստերը իրական են: Ֆիլմի ռեժիսոր Գագիկ Աթասյանը արցախցի է. նա ևս 3 տարի մասնակցել է Ղարաբաղի ազատագրական պայքարին: Վերջին տարիներին Մոսկվայում է աշխատում, որտեղ շուտով նկարահանվելու է նրա սցենարով գրված` արդեն մեծ աղմուկ հանած Это Москва… ֆիլմը: Հիմա Գ.Աթասյանը Հայաստանում է, որպեսզի ձեռք բերած փորձն օգտագործի ու նկարահանի արցախյան հերոսամարտի մասին պատմող ֆիլմը: «Կարծում եմ` նախագծի շուրջ կհավաքվեն իմ ընկերները, ովքեր համաշխարհային կինոյի ու շոու-բիզնեսի ներկայացուցիչներ են: Մենք գիտենք մեր պատմությունը, արցախյան գոյամարտի իրականությունը, սակայն օտարազգիները չգիտեն, ու ֆիլմը մի քայլ կլինի նաև այս ոլորտում»,- ասում է ռեժիսորը: «Թեկուզ»-ի սցենարիստը արցախցի գրող Արփի Վանյանն է: «Պատերազմի առաջին օրվանից մինչև վերջին օրը եղել եմ իմ քաղաքում: Ինձ վրա զգացել եմ այն ամենը , ինչը կոչվում է պատերազմ: Ֆիլմում նկարագրված գրեթե բոլոր պատերազմական դեպքերը (թիկունքի) կապված են ինձ, իմ ընտանիքի, իմ հարազատների հետ: Գրեթե բոլոր դեպքերի ականատեսն էի»,- ասում է Արփին: Ֆիլմում (երբեմն արխիվային կադրերի միջոցով նաև) խոսվում ու պատմվում է Սերժ Սարգսյանի, Ռոբերտ Քոչարյանի, Սամվել Բաբայանի, Կոմանդոսի, Մոնթեի, Քերոլայն Քոքսի, ինչպես նաև բարերարներ` Լևոն Հայրապետյանի ու նրա ընկերների Ռ. Վարդանյանի, Դ. Խաչատուրովի, Ս. Սարկիսովի, Գ. Զաքարյանի Գ. Մեհրաբյանի, Ա. Խաչատրյանի, Ա. Թավադյանի, Վ. Գասումյանի, Ս. Մուրադյանի, Ա. Պարոնյանի, Գ. Նահապետյանի, Կ. Մկրտչյանի, Ս. Կարապետյանի մասին: Այլ մանրամասներ ֆիլմի հեղինակները առայժմ չեն ուզում հայտնել: Մեծամասշտաբ այս ֆիլմում նկարահանվելու են անվանի շատ դերասաններ` ինչպես Հայաստանից, այնպես էլ Ռուսաստանից և արտերկրից: Նախնական պայմանավորվածություններ արդեն ձեռք են բերվել: Ֆիլմը նկարվելու է գեղարվեստական ֆիլմերի համար նախատեսված ժամանակակից տեխնիկայով: Այս օրերին ֆիլմի ֆինանսավորման հարցերն են լուծվում: «Կարծում ենք, որ ֆիլմը կօգնի այլ ազգերին համակողմանի ծանոթանալու ղարաբաղյան հիմնախնդրին, տեսնելու, թե իրականում ինչ է կատարվում»,- համոզված են սցենարիստն ու ռեժիսորը: