Ռուսական Regnum լրատվական գործակալության փոխանցմամբ՝ այսուհետ թուրք կանայք ունեն տղամարդկանց հավասար իրավունք՝ ամուսնալուծության կամ ամուսնության չեղյալ հայտարարման դեպքում երեխաների ազգանվան ընտրության հարցում: Այսօր այսպիսի որոշում է ընդունել Թուրքիայի Սահմանադրական դատարանը:
Նշվում է, որ Սիիրթի առաջին ատյանի դատարանը դիմել է Սահմանադրական դատարան՝ առաջարկելով չեղյալ հայտարարել Ազգանունների մասին օրենքը, ըստ որի՝ ամուսնալուծության կամ ամուսնության չեղյալ հայտարարման դեպքում երեխայի հայրն իրավունք ունի նրան ընտրել ազգանուն:
Թուրքիայի Սահմանադրական դատարանը բավարարել է դա՝ այն առաջընթաց քայլ համարելով սեռերի հավասարության ուղղությամբ և ընդգծելով, որ նախկին օրենքը հակասում է Սահմանադրության 10-րդ ու 41-րդ հոդվածներին:
Սահմանադրական դատարանի որոշումը արդեն իսկ հրապարակվել է:
Հիշեցնենք, որ 1979 թվականին ՄԱԿ-ի ընդունած Կանանց նկատմամբ խտրական վերաբերմունքի ամեն տիպի ձևերի վերացման մասին կոնվենցիայով (CEDAW) նախատեսվում է, որ տղամարդիկ ու կանայք ունեն հավասար իրավունքներ՝ ընտանիքում ազգանվան ընտրության հարցում:
