Պարզվում է, ոչ հեռու ապագայում երևանցիներն արդեն վերջին հանգրվանի համար հող չեն ունենա: Երևանում ժամանակի հետ պակասում են գերեզմանատարածքները: Մայրաքաղաքում ընդհանուր առմամբ այժմ կա 21 գերեզմանատուն, որից 14-ը մասնակի փակ են, այսինքն` կան գերեզմաններ, որոնց մեջ կան ազատ հողակտորներ, իսկ բաց գերեզմանատները Երևանում ընդամենը 4-ն են:
«Մինչև 2020 թիվը, համաձայն համապատասխան մասնագետների հաշվարկների, Երևանում նոր գերազմանատուն կառուցելու համար անհրաժեշտ է 46.5 հա հողատարածք, որը չունենք»,- մեզ հետ զրույցում նշեց Երևանի քաղաքապետարանի «Բնակչության հատուկ սպասարկում» ՓԲԸ ինժեներ Ռազմիկ Հարությունյանը:
Ըստ «Բնակչության հատուկ սպասարկում» ՓԲԸ-ի` Երևանում ամեն ամիս հողին են հանձնում 500-600 մարդու: Տարեկան այդ թիվը հասնում է 6000-ի: Երևանի շատ գերեզմանատներ էլ վաղուց արդեն ծանրաբեռնված են, այդ իսկ պատճառով դրանցից մի քանիսը փակվել են հետագա թաղումների համար: Ոլորտի երկար տարիների մասնագետն այստեղ միայն մեկ լուծում է տեսնում` դիակիզարանների կառուցում, սակայն համոզված է նաև, որ հայերը դժվար կհարմարվեն շքեղ գերեզմաններ կառուցելու իրենց սովորությունը խախտելուն, քանի որ դիակիզարանների դեպքում կառավարության հատկացրած հողատարածքը հազիվ կբավականացնի դին ամփոփելու համար: Դե, իսկ եղևնիներին և «բեսեդկաներին» տեղ չի մնա: