ՀՀ Արդարադատության նախարարությունը բացարձակ ապօրինի կերպով գրանցել է նոր` Սոցիալ-դեմոկրատ հնչակյան կուսակցությունը` ակնհայտորեն ցանկանալով ուզուրպացնել Հայ ազգային կոնգրեսի մաս կազմող Հնչակյան կուսակցությունը և հանձնել այն իր կողմից կառավարվող անհատներին: Այս մասին «Առաջին լրատվական»-ը տեղեկանում է ՀԱԿ-ի հաղորդագրությունից:
«Վերջին մի քանի օրերին սա արդեն երկրորդ դեպքն է, երբ իշխանությունների կողմից հետապնդման թիրախ է ընտրվում Կոնգրեսի մաս կազմող կուսակցություն: Մի քանի օր առաջ վարչախումբը ապօրինաբար, իրեն հպատակ դատական իշխանության օգնությամբ, ըստ էության խլեց «Ժողովրդավարական հայրենիք» կուսակցության գրասենյակը:
Տեսնելով Հայ ազգային կոնգրեսի` գնալով աճող հեղինակությունը, վարչախումբը մարտահրավեր է նետել Սահմանադրությամբ երաշխավորված ևս մեկ հիմնարար ազատության` միավորումների ազատությանը»,- նշված է հայտարարության մեջ:
Հայ ազգային կոնգրեսը դատապարտում է վարչախմբի այս ապօրինի քայլերը և պահանջում անմիջապես դադարեցնել Սոցիալ-Դեմոկրատ Հնչակյան և «Ժողովրդավարական հայրենիք» կուսակցությունների նկատմամբ սանձազերծված իրավական կամայականությունները:
