ԱՄՆ վարչակազմը պատրաստվում է 80%-ով կրճատել երկրի միջուկային զինանոցը, սակայն այդ ծրագիրն առայժմ չի ներկայացվել երկրի նախագահ Բարաք Օբամային: Այս մասին հաղորդում է Associated Press-ը՝ վկայակոչելով Ամերիկյան Կոնգրեսի և Սպիտակ տան իր աղբյուրները:
Գործակալությունը նշում է, որ այդ քայլը կհամապատասխանի ԱՄՆ նախագահ Բարաք Օբամայի ծրագրին, որը 2009 թ. խոստացավ համընդհանուր միջուկային զինաթափում, սակայն անկասկած, քննադատությունների տեղիք կտա հանրապետականների կողմից:
Աղբյուրների համաձայն՝ Սպիտակ տունն ուսումնասիրում է ռազմավարական միջուկային զինանոցը կրճատելու երեք տարբերակ. մինչև 1100-1000, 800-700 և 400-300 մարտագլխիկ: Թե ինչ որոշում կկայացվի՝ առայժմ հայտնի չէ:
Սպիտակ տան ներկայացուցիչ Թոմի Վիետորը նշել է, որ ծրագիրն անգամ Օբամային չի ներկայացվել: Իսկ Պենտագոնի մամլո քարտուղար Ջորջ Լիթլը հրաժարվել է որևէ մեկնաբանություն տալ այդ թեմայով՝ պատճառաբանելով դրա գաղտնի բնույթը: Այնուամենայնիվ, նա նշել է, որ նախագահը Պենտագոնին հանձնարարել է միջուկային զինանոցին փոխարինող այլընտրանքային մոտեցում մշակել:
Ռուսաստանի և ԱՄՆ-ի միջև կնքված պայմանագրի համաձայն՝ երկու երկրները, սկսած 2018 թ., կարող են ունենալ ոչ ավել քան 1550 միջուկային մարտագլխիկ: Միջուկային զինանոցի կրճատումը մինչև 300 մարտագլխիկ ԱՄՆ-ին կվերադարձնի նախորդ դարի 50-ականների իրավիճակին:
