Փետրվարի 12-ին Հրազդանի քաղաքապետի ընտրություններում հաղթեց Հանրապետական կուսակցության անդամ Արամ Դանիելյանը, որի օգտին քվեարկել էր 13.790 ընտրող, իսկ քաղաքապետի մյուս թեկնածու Սասուն Միքայելյանի օգտնին քվեարկել էր 11.506 հոգի: Ընտրությունների տպավորությունների շուրջ զրուցել ենք Կոտայքի մարզպետ Կովալենկո Շահգալդյանի հետ:
– Պարոն Շահգալդյան, ընտրությունների ողջ ընթացքում Ձեր համակրանքը Արամ Դանիելյանի կողմն էր: Ըստ Ձեզ՝ ինչպե՞ս դրսևորվեց ընտրությունների ամբողջ ընթացքը:
– Ընտրություններն անցել են ՀՀ Ընտրական օրենսգրքով սահմանված կարգին համապատասխան: Ընդհանրապես գործընթացը համապատասխանել է օրենքով սահմանված կարգին:
– Դուք նշել եք, որ որոշակի ընտրախախտումներ, այնուամենայնիվ, եղել են, կփորձե՞ք պարզել` ինչպիսի՞:
– Բայց ես ե՞րբ եմ այդպիսի բան ասել: Եղել են ոչ թե ընտրախախտումներ, այլ շահարկումներ, որ իբր ընտրախախտումներ են եղել: Եվ վերջապես` Սասուն Միքայելյանի վստահված անձինք հանդիսանում են ՀՀՇ-ի կարկառուն դեմքերը, և վերջապես` Ազգային կոնգրեսն իր «ծանր հրետանին» տեղափոխել էր Հրազդան, որոնք նախավարժեցված էին ընտրախախտումներին, որոնց մտքի արգասիքը 90-ականների ընտրախախտումներն են, բայց ընտրություններն անցան հարթ, առանց չեպեների:
– Դուք նշում եք, որ 90-ականների ընտրախախտումներին են վարժեցված, ուզում եք ասել, որ վերջին տարիներին ընտրախախտումներ չե՞ն եղել, և այս անգամ կարողացաք պաշտպանե՞լ ընտրություններն ընտրախախտումներից:
– Ընդհանրապես ընտրախախտումների քայլեր չեն արվել, նախկինում որոշ խախտումներ եղել են, բայց դրանք ևս որակ չեն կարողացել կազմել և ազդեցություն չեն ունեցել:
– Արամ Դանիելյանն ասել էր, որ իր հաղթանակը նաև Սերժ Սարգսյանի հաղթանակն է: Դո՞ւք էլ եք այդպես կարծում:
– Արամ Դանիելյանը նման բան չի ասել, ամեն դեպքում ես նման բան չեմ լսել: Արամ Դանիելյանն ընդամենը հայտարարել էր, որ այս պայքարը թիմային պայքար է, որովհետև կուսակցությունը թիմ է, համախոհների խմբավորում և միավորում է, և այդ պայքարը թիմով էր ընթանում: Կարծում եմ՝ դա է ի նկատի ունեցել, իսկ կոնկրետ նախագահի անունը չեմ կարծում, որ ինքը տված լինի: Ինքը ասել է Հանրապետական կուսակցություն, բնականաբար կուսակցության նախագահը հանրապետության նախագահն է, և այդ եզրակացությունները դրա հետ են կապված: Իսկ Արամ Դանիելյանը նման միտք չի արտահայտել: Համոզված կարող եմ ասել:
– Ի՞նչ եք կարծում` իսկապե՞ս վարչական ռեսուրսը հաղթեց ընդդիմությանը, և ընդդիմությունը պարտվեց իշխանությանը:
– Դա բացարձակապես իրականությանը չի համապատասխանում: Եթե մենք օգտագործեինք վարչական ռեսուրսը, ընտրակաշառք կիրառվեր, իմացեք, որ անհամեմատ տարբերությունը մեծ կլիներ, բնականաբար` հօգուտ Արամ Դանիելյանի: Ոչ մի վարչական ռեսուրս չի օգտագործվել, դրա կարիքն էլ չկա, մենք կանխավ համոզված էինք մեր թեկնածուի հաղթանակի մեջ, դրա համար էլ ոչ մի ռեսուրս էլ պետք չի եկել, և չենք օգտագործել:
– Ինչո՞վ էր պայմանավորված կանխավ համոզվածությունը, ժողովո՞ւրդն էր շատ սիրում Արամ Դանիելյանին:
– Ժողովուրդը համեմատության մեջ է դրել Հրազդան քաղաքի նախկին երկու քաղաքապետերի աշխատանքները, և բնականաբար Դանիելյան Արամը ունի մեծ առավելություն, դրա համար նախապատվությունը տվեցին գործող քաղաքապետին, ոչ թե նախկինին:
– Այնուամենայնիվ, Դուք ի պաշտոնե իշխանության ներկայացուցիչ եք, այս տարիների ընթացքում չկա՞ն արդյոք հարցեր, որոնց պատասխանատվությունը Դուք եք Ձեզ վրա կրում: Որպես պաշտոնյա՝ Ձեզ որևէ բանում մեղավոր զգացե՞լ եք այս տարիներին:
– Ինչպես բոլոր երկրներում, այնպես էլ մեզ մոտ կան բազմաթիվ խնդիրներ: Մենք ընդամենը քսան տարվա պետություն ենք, և կան բազմաթիվ և բազմապիսի խնդիրներ, որոնք պետք է լուծվեն տարիների ընթացքում: Իհարկե ամեն պաշտոնյա իր մեղքի բաժինը որոշ չափով ունի, իհարկե կան բազմաթիվ գործոններ, որոնք հնարավորություն չեն ընձեռում երկրի բոլոր խնդիրները լուծելու, և չեմ էլ պատկերացնում, որ կգա մի ժամանակ, որ երկրում ընդհանրապես խնդիր չի լինի: Այդպիսի հասկացողություն ընդհանրապես չկա, լավից լավը կա, լավից էլ լավագույնը կա, այնպես որ…
– Արդյոք պատասխանատվության Ձեր չափաբաժինը զգացե՞լ եք այսքան ժամանակ, առաջիկա ընտրություններին ի՞նչ առաջնահերթություններ կդնեք:
– Համայնքներում կան բազմաթիվ խնդիրներ, մենք կազմել և կառավարության հաստատմանն ենք ներկայացրել մարզի զարգացման ծրագիրը, ըստ որի մենք փորձելու ենք տարեցտարի ծրագրի շրջանակներում լուծել մեզ համար ամրագրված խնդիրները առաջիկա երեք տարիներին: Բազմաթիվ խնդիրներ ունենք, որոնք կապված են մեր ժառանգության հետ: Մենք խորհրդային երկրից ստացել ենք ժառանգություն, որը իհարկե ցանկալի է, որ ավելի լավը լիներ: Ընդամենը մեկ օրինակ բերեմ. հատկապես քաղաքային համայնքներում բազմաբնակարան շենքերի վիճակը միլիարդների հասնող ներդրումներ է պահանջում, որ պահպանենք, վերակառուցենք, իսկ պետական բյուջեն երկու տարվա մեջ լուծելու հնարավորությունը մեզ չի տալիս:
– Ասում են՝ ԲՀԿ-ն Ձեր մարզում առավել քան ակտիվ է, ըստ Ձեզ՝ իշխանական ո՞ր կուսակցությունն է ավելի նպաստավոր դիրքերում:
– Այդ ամենը հարաբերական հասկացողությունների համատեքստից է: Մայիսի 6-ին ընտրություններ են, և ընտրությունների հաջորդ օրը մեր երկրում բոլորը կիմանան` ինչ աջակցություն ստացավ, ինչ վստահության քվե ստացավ ժողովրդի կողմից, և այդ մասին դուք էլ կիմանաք: Անկեղծ ասած` ես չեմ պատրաստվում ենթադրություններ անել: Ամեն մի կուսակցություն ունի համակիրները, որոնք առաջիկա ընտրությունների ժամանակ իրենց խոսքը կասեն:
– Նախընտրական տրամադրություն, ոգևորություն կա՞ արդյոք:
– Ընդհանրապես մենք քաղաքականացված ազգ ենք, ոգևորություն չէի ասի, կա նախապատրաստական աշխատանքների ակտիվություն:
– Առավել ակտի՞վ է, քան նախորդ անգամ` տրամադրությունների առումով:
– Դեռևս չի երևում:
– Ի՞նչ ակնկալիքներ ունեք այս ընտրություններից:
– Բոլոր ընտրություններին մեր երկրում պետք է կարողանանք համապատասխան պայմաններ ստեղծել, որ անցնի օրենքի շրջանակներում, որովհետև մենք քաղաքակիրթ ժողովուրդ ենք, և քաղաքակիրթ աշխարհին մեր ընտրությունների գործընթացով ներկայանալի դառնանք:
– Չնայած ընտրակաշառքի պահին նկարահանված հոլովակը հուշեց, թե քաղաքակրթությունից ինչքան հեռու ենք:
– Ունենք այն, ինչ ունենք: Բայց դա չի կարելի ընդհանրացնել և ամբողջ ազգի նկարագիրը մի քանի հոգու հետ կապել:
