ՏԻՄ ընտրությունների ժամանակ, այդ թվում՝ Հրազդանում կոպիտ ընտրախախտումներ չեն գրանցվել: «Առաջին լրատվական»-ի հետ զրույցում նման տեսակետ հայտնեց ՏԻՄ ընտրությունների ժամանակ դիտորդական առաքելություն իրականացնող Հելսինկյան քաղաքացիական ասամբլեայի իրավապաշտպան Նատալյա Մարտիրոսյանը`գնահատելով ընտրությունների ընթացքը և գրանցված ընտրախախտումները:
Ըստ նրա` կոպիտ խախտումներ չեն եղել: «Ընտրությունները շատ թե քիչ նորմալ մթնոլորտում են անցել: Ընդհանուր առմամբ բավականին նորմալ է անցել, և կոպիտ խախտումներ չեն արձանագրվել: Կա մի հանգամանք, որը կարևորում ենք և ուզում ենք պարզաբանումներ տալ: Օրենքում նախատեսված է, որ հանձնաժողովը պետք է ունենա հատուկ փոքրիկ կնիք, որը փաստորեն, ըստ օրենքի, պետք է դրոշմվի անձնագրի վերջին էջում ընտրությունից հետո: Ինչքանով մենք ենք տեղյակ, բոլոր ընտրատարածքներում դա չի կիրառվել, և կարծում եմ, որ դա բավականին լուրջ վրիպում է, որը փաստորեն օրենքին չի համապատասխանում»,- մեկնաբանեց իրավապաշտպանը:
Այն հարցին, թե հնարավոր է այս կերպ ընտրողը երկու անգամ քվեարկի, պատասխանեց, որ տեսականորեն դա հնարավոր է: «Եթե օրենքը պահանջում է կնիքներ, դա պետք է կատարվեր»,- ասաց իրավապաշտպանը: Ինչ վերաբերում է բռնությանը և կոպիտ ընտրախախտումներին` նման երևույթներ չեն գրանցվել:
Հիշեցնենք, որ կիրակի օրը տեղի ունեցան ՏԻՄ ընտրություններ: Հրազդանում այս ընտրությունների շրջանականում տեղի ունեցան քաղաքապետի ընտրությունները, որի արդյունքում փոքր առավելությամբ քաղաքապետ վերընտրվեց Արամ Դանիելյանը:
