Ինչպես հաղորդում է CNN հեռուստաընկերությունը, ԱՄՆ Հանրապետական կուսակցությունում տրամադրությունները զգալիորեն փոխվել են, և առաջիկա նախագահական ընտրությունների ժամանակ այդ կուսակցության հիմնական թեկնածու համարվող Միթ Ռոմնին հետզհետե դիրքերը զիջում է նախկին սենատոր Ռիք Սանտորումին: Նշվում է, որ հիմնական տարաձայնությունները գաղափարական բնույթի են:
Հարցումների համաձայն` Սանտորումին աջակցում է Հանրապետական կուսակցության անդամների և ոչ կուսակցականների մոտ 34%-ը, իսկ ահա Ռոմնիին պատրաստվում է ձայն տալ հանրապետականների մոտ 32%-ը: Նշվում է, սակայն, որ այս տարբերությունը չնչին է, և Ռոմնին, որը վերջին մեկ տարվա ընթացքում բոլոր հարցումների առաջատարն էր, դեռ կարող է շրջանցել Սանտորումին:
Սանտորումից և Ռոմնիից զգալիորեն ետ են մնում մյուս երկու թեկնածուները` Ռոն Փոլը (16%) և Նյութ Գինգրիչը` մոտ 15%:
Ռոմնիի օգտին է խոսում այն հանգամանքը, որ հարցվածների մոտ 68%-ն, այդուհանդերձ, կարծում է, որ Հանրապետական կուսակցության նախագահական թեկնածու կդառնա Մասաչուսեթս նահանգի նախկին ղեկավարը:
