«Երկիր»-ը օրեր առաջ անդրադարձել էր Երիտասարդական խորհրդարանից ազատվելու Աժ նախագահ Սամվել Նիկոյանի ցանկությանը:
«Գրել էինք, որ երիտասարդ պատգամավորներն արդեն մի քանի ամիս է` նիստեր չեն անում, և այսկերպ Աժ նորընտիր նախագահը, հավանաբար, փորձում է ազատվել Հովիկ Աբրահամյանի նաև այս ժառանգությունից:
Հակառակն ապացուցելու համար երեկ Երիտասարդական խորհրդարանը նիստ էր գումարել, ինչը լուսաբանելու ցուցում էին ստացել նաև հայրենի հեռուստաընկերությունները, որոնք, սովորաբար, ԵԽ նիստերին ուշադրություն չէին դարձնում: Սակայն նրանք էլ էին լուրջ փաստի առաջ կանգնել. լուսաբանելու բան չկար, քանի որ երիտասարդ պատգամավորները չէին կարողանում անգամ քվորում ապահովել. 131-ի փոխարեն գրանցվել էին ընդամենը 44-ը»,- ապա «Երկիր»-ը հավելում է.
«Երիտասարդ խորհրդարանականները, թեև գրեթե բոլոր հարցերում կրկնօրինակում են ավագներին, սակայն միմյանց փոխարեն գրանցվելու և քվեարկելու ձևերը երևի դեռ չեն սովորել: Փոխարենը 20 րոպեանոց ընդմիջում խնդրելու և խմբակցությունների պատգամավորներին միջանցքներից դահլիճ բերելու տեխնոլոգիաներին արդեն ծանոթ են: Քվորումն ապահովվեց մոտ կես ժամ ուշացումով: Նիստը «կարևորել» և դիտելու էր եկել նաև Սամվել Նիկոյանը»:
