Ռուսաստանի Դաշնության վարչապետ Վլադիմիր Պուտինը հայտարարել է, որ ո՛չ ինքը և ո՛չ էլ նախագահ Դմիտրի Մեդվեդևը «կառչած չեն» ժամերը ձմեռային և ամառային փոխելու որոշումից, և կոչ է արել չքաղաքականացնել այդ հարցը:
«Անհրաժեշտ է ևս մեկ անգամ խոսել փորձագետների հետ, քննարկել այդ հարցը հասարակության հետ և այնուհետև հանգիստ, չքաղաքականացված վերլուծությունից հետո վերջնական որոշում ընդունել»,- ասել է վարչապետը՝ Կուրգանի միջնակարգ դպրոցի աշխատակիցների հետ հադիպման ժամանակ:
«Դմիտրի Անատոլևիչն այդ որոշումն ընդունել է այն բանից հետո, երբ շատերը խնդրել էին կասեցնել ժամերի փոփոխումը»,- հիշեցրել է նա:
Ինչպես հաղորդում է 1news.az-ը, հղում կատարելով РИА Новости-ին, Պուտինը նաև ասել է, որ ո՛չ ինքը,և ո՛չ նախագահը չեն ասել, որ աշնանն ընդունված որոշումը վերջնական է: Նրա կարծիքով՝ այդ որոշման քննադատությունը կապված է այն բանի հետ, որ ժամանակի փոփոխությունն անհարմարություններ է պատճառել նրանց, ովքեր հաճախ են ճանապարհորդում, նայում են արտասահմանյան հեռուստահեռարձակումներ: «Սակայն այդ որոշումն ընդունվել էր, քանի որ շատ մարդիկ բացասաբար էին վերաբերվում ժամանակի փոփոխմանը»,- ավելացրել է վարչապետը:
