Չորեքշաբթի գիշերը ռեկորդային ցածր ջերմաստիճան է գրանցվել Աֆղանստանի մայրաքաղաքում`-15 C: Այս մասին հայտնել է ազգային հիդրոօդերևութաբանական կայանը: Ուժեղ սառնամանիքների պատճառով Քաբուլի փախստականների ճամբարներում մահացել է ավելի քան 20 երեխա, «Տոլո» հեռուստաընկերության հետ հարցազրույցում հայտարարել է Աֆղանստանի առողջապահության նախարարության մամլո քարտուղար Գուլյամ Ցախի Կարգարը:
Աֆղանստանի հիդրոօդերևութաբանական կայանի տվյալներով, տասնամյակներ շարունակ Քաբուլում ջերմաստիճանն այսքան ցածր չի եղել:
Կարմիր խաչի Միջազգային կոմիտեի աֆղանական բաժնի ղեկավար Ֆատիմա Գիլանին երեքշաբթի օրը հայրենակիցներին կոչ է արել անհապաղ օգնություն ցույց տալ Քաբուլի փախստականների ճամբարներում վրանների տակ սառչող մարդկանց՝ հայտարարելով, որ հակառակ դեպքում նրանք կմահանան:
Փախստականների ճամբարի ավագանու խոսքերով՝ ցրտից մահացել են 22 երեխաներ և մի քանի մեծահասակներ: Տասնյակ երեխաներ, որոնք հիմա բաց և պլաստիկ վրանների տակ են, ծանր հիվանդ են: Նրանց ընտանիքները վառելիքի և դեղորայքի համար միջոցներ չունեն:
Սակայն Աֆղանստանի Փախստականների հարցով նախարարության մամլո քարտուղար Սալամուդդին Ջուրատը երեխաների մահվան տվյալները «բացահայտ չափազանցություն» է որակել` դրանք համարելով ոչ հավաստի: Մինչդեռ Քաբուլի տեղական և արևմտյան ԶԼՄ-ների ներկայացուցիչները հայտարարել են, որ անձամբ եղել են գերեզմաններում, որոնք գտնվում են փախստականների ճամբարների մոտ և համոզվել, որ այնտեղ հայտնվել են մեծ թվով նոր շիրմաթմբեր:
Տվյալ պահին Քաբուլում՝ փախստականների տարբեր ճամբարներում ապրում է ավելի քան 30 հազար մարդ, որոնք հիմնականում հարավային ծայրամասերից գաղթականներ են և տնանկ են դարձել ռազմական գործողությունների պատճառով, ինչպես նաև հայրենադարձներ` Պակիստանից և Իրանից:
ՄԱԿ-ի տվյալներով, ավելի քան 450 հազար աֆղանցիներ ներկա պահին չունեն մշտական բնակության վայր: Միայն 2011 թվականին պատերազմի պատճառով Իսլամական Հանրապետության 185 հազար քաղաքացիներ ստիպված էին լքել իրենց տները`պատերազմից փրկվելու համար: Սա մոտավորապես 45%-ով ավելի է, քան մեկ տարի առաջ: