Եգիպտոսի մայրաքաղաք Կահիրեում սպանվել է գերմանական Siemens ընկերության վարչական և ֆինանսական ներկայացուցիչ Հանի Լոկան:
Ինչպես հաղորդում է եգիպտական Al-Masri Al-Youm թերթը, 45-ամյա տղամարդու մարմինը հայտնաբերվել է մայրաքաղաքի արվարձաններից մեկում՝ անապատային տարածքում: Մարմնի վրա նկատելի են բռնության հետքեր:
Հանի Լոկան կորել էր 4 օր առաջ: Այդ մասին նրա հարազատները հայտնել էին ոստիկանություն, որն էլ հայտնաբերել է նրա անդամահատված և այրված մարմինը:
Siemens ընկերությունը հաստատել է իր տարածաշրջանային ներկայացուցչի մահվան փաստը:
Դեպքի առիթով ձերբակալվել են երկու կասկածյալ՝ ծացումով պաղեստինցի ու Հորդանանի քաղաքացի մի մարդ և նրա ընկերը։ Երկուսն էլ աշխատում են քաղաքի դեղատներից մեկում:
Ոստիկանությունից հայտնել են, որ նրանք փորձել են դրամ շորթել Լոկայից, իսկ երբ վերջինս հրաժարվել է, որոշել են թալանել նրան ու սպանել: Հանցագործութան հետքերը թաքցնելու համար նրանք անդամահատել են իրենց զոհին և այրել:
Հանցագործները պատմել են, որ իրենք Լոկայի հետ ծանոթացել են մոտ մեկ տարի առաջ Կահիրեի հյուրանոցներից մեկում: Քանի որ իրենք ֆինանսական դժվարություններ ունեին, որոշել են օգնություն ստանալ Լոկայից:
Siemens-ը Եգիպտոսում աշխատում է արդեն ավելի քան 110 տարի: Նրա տարածաշրջանային ներկայացուցչությունը բաղկացած է 500 աշխատակիցներից: