Սիրիայի ընդդիմությունում կարծում են, որ եկել է կառավարության հետ փոխզիջումների ժամանակը: Այս մասին հաղորդում է BBC-ն՝ վկայակոչելով ընդդիմության առաջնրոդներից Քամալ Ալ-Լաբվանիին:
«Բաշար Ալ-Ասադը չի կարող շարունակել կառավարել երկիրը սեփական քաղաքների ռմբակոծություններից հետո»,- ասել է նա:
Reuters-ը հայտնում է, որ այս գիշեր դարձյալ կառավարական զորքերը 8 ժամ ռմբակոծության են ենթարկել քաղաքը, որին զոհ է գնացել առնվազն 47 մարդ: Al-Arabiya-ն իր հերթին նշում է, որ հիմնական հարվածը հասցվում է Բաբ Ամրո թաղամասին, որտեղ միայն վերջին երկու օրերին զոհվել է ավելի քան 100 մարդ, և որը ռմբակոծության հետևանքով գործնականում ամբողջությամբ ավերվել է:
Ականատեսներից մեկի վկայությամբ՝ կառավարական տանկերը շարժվում են դեպի քաղաքի կենտրոնական շրջաններ և շուտով կմոտենան բնակելի թաղամասերին: Նա ասել է, որ քաղաքում կապի միջոցների խափանումների պատճառով ընդհանուր պատկերը դժվար է նկարագրել:
Հոմսի հրետանային ռմբակոծությունը սկսվել է փետրվարի 4-ին: Մոտավոր տվյալներով՝ 4 օրում այստեղ զոհվել է շուրջ 350 մարդ: Հոմսից բացի, հրետակոծության է ենթարկվում նաև Դամասկոսից 30 կմ հեռավորության վրա գտնվող Զաբդանի քաղաքը, որտեղ վերջին 2 օրում զոհվել է 10 մարդ:
Միջազգային կազմակերպությունների տվյալներով՝ 2011 թ. դեկտեմբերի կեսի դրությամբ՝ Սիրիայում զոհվել է ավելի քան 5000 մարդ: Այնուամենայնիվ, սրանք արդեն հին տվյալներ են, իսկ նորը ստանալու հնարավորություն չկա: ՅՈՒՆԻՍԵՖ-ի տվյալներով՝ զոհերից 384-ը երեխաներ են:
Սիրիայում տիրող իրավիճակը շարունակում է մնալ միջազգային հանրության ուշադրության կենտրոնում: Արևմուտքի և Արաբական պետությունների լիգայի երկրները պահանջում են Սիրիայի նախագահ Բաշար Ալ-Ասադի հրաժարականը: Ռուսաստանը և Չինաստանը պաշտպանում են Սիրիայի իշխանություններին: Մասնավորապես ՄԱԿ-ի Անվտանգության խորհրդում նրանք արգելափակեցին Սիրիայի դեմ բանաձևը:
Երեկ այցով Դամասկոսում էր գտնվում Ռուսաստանի արտգործնախարար Սերգեյ Լավրովը, որը Սիրիայի նախագահ Բաշար Ալ-Ասադի հետ ունեցած հանդիպումից հետո հայտարարեց, որ Ասադը պատրաստ է երկխոսության և հանդես է գալիս երկրում ճգնաժամը հաղթահարելու դիրքերից:
Նշենք, որ Սիրիայում շարունակվող արյունալի դեպքերի ֆոնին Դամասկոսից իրենց դեսպաններին հետ են կանչել Ֆրանսիայի, Բելգիայի, Իտալիայի, Իսպանիայի և Ծոցի արաբական երկրների համագործակցության խորհրդի երկրները: Ավելի վաղ նման քայլի էին դիմել ԱՄՆ-ը և Մեծ Բրիտանիան:
