Ամերիկյան Forbes ամսագիրը հրապարակել է «ԱՄՆ ամենատխուր քաղաքների» ցուցակը, որում առաջին հորիզոնականը զբաղեցնում է Մայամին:
Վարկանիշային աղյուսակի հեղինակների կարծիքով՝ Մայամին «դրախտային անկյուն» է թվում միայն առաջին հայացքից: Իրականում քաղաքում տիրում է սուր բնակարանային ճգնաժամ, իսկ հանցավորության մակարդակն ամենաբարձրն է ԱՄՆ-ում:
«Մայամին ավանդաբար ասոցացվում է ծովափերի և լավ եղանակի հետ, բայց մարդիկ այս քաղաքում այնքան էլ երջանիկ չեն: Այստեղի բնակիչների մեկ տոկոսին կյանքը հեքիաթ է թվում, սակայն մյուսների կյանքն այնքան էլ հեշտ չէ: Հարուստների և աղքատների միջև այս անդունդը վերջին տարիներին ավելի է խորանում»,- մեկնաբանել է ամսագրի խմբագիր Քուրթ Բեդենհաուզենը:
Վարկանիշային աղյուսակի երկրորդ հորիզոնականում Դեթրոյթն է (Միչիգան նահանգ), որը երկրի ամենահանցավոր քաղաքն է: Առաջին եռյակում է հայտնվել նաև նույն նահանգի մեկ այլ քաղաք՝ Ֆլինթը, որը համարվում է General Motors ընկերության «օրրանը»: Այն նույնպես համարվում է ԱՄՆ ամենահանցավոր քաղաքներից մեկը:
Ամենատխուր քաղաքների տասնյակում են հայտնվել նաև Ուեսթ Փալմ Բիչը (Ֆլորիդա), Սակրամենտոն (Կալիֆոռնիա), Չիկագոն (Իլինոյս), Ֆորթ Լոդերդեյլը (Ֆլորիդա), Տոլեդոն (Օհայո), Ռոքֆորդը (Իլինոյս) և Ուորենը (Միչիգան):
Վարկանիշային աղյուսակը կազմելիս հաշվի են առնվել այնպիսի գործոններ, ինչպիսիք են գործազրկության և հանցավորության մակարդակը, անշարժ գույքի արժեքը, հիփոթեկային վարկի պարտքերի պատճառով տներից դուրս հանված բնակիչների թիվը, կոռուպցիայի մակարդակը և անգամ կլիման:
