Ես այն, ինչ մտածել եմ, այն էլ ասել եմ։ Ինձ թվում է՝ դա մարդու վիճակից է։ Նա է որոշում՝ խոսե՞լ այդ մասին, թե՞ ոչ։ «Առաջին լրատվական»-ի հետ զրույցում ասաց երգչուհի Նադեժդա Սարգսյանը։
Նրա խոսքով՝ խոսքի ազատությունն իր համար այն է, որ կարողանա մարդ խոսել թե՛ վատի, թե՛ լավի մասին ու դրա պատճառով է ինքը և՛ քննարկվել, և՛ քննադատվել։ «Ես չեմ վախեցել ճիշտ խոսելուց։ Դա կախված է երևի մարդու ներաշխարհից։ Որքանով կարող ես ճիշտ լինել, այնքանով էլ կարող ես ազատ լինել»,- ասաց երգչուհին։
Հարցին՝ արդյոք դժվա՞ր չէ այն մարդու համար, որը սիրում է դիմացինների երեսին ասել ճշմարտությունը, երգչուհին պատասխանեց, որ իհարկե, դժվար է՝ մանավանդ այն դեպքում, երբ ինքը հանրային անձնավորություն է։ «Իմ ամեն խոսքն ավելի է քննադատվում, բայց ես կարծել եմ, որ ճիշտ եմ վարվում»,- հավելեց նա։
Արդյոք մենք ունե՞նք խոսքի ազատության մշակույթի պակաս հարցին էլ պատասխանեց, որ մեզանում շատերը ճիշտ չեն հասկացել խոսքի ազատությունը ու այն շփոթել են խոսքի անբարոյականության հետ։ «Խոսքի ազատության կուլտուրան այդքան էլ զարգացած չէ մեզ մոտ։ Եթե մի բան է գրվում մամուլում, պետք է ներկայացվի նաև մյուս կողմի դիրքորոշումը»,- ասաց նա։
«Ես փողոցում չեմ ստացել զրպարտությունը, այլ մամուլով։ Իմ մասին գրել են այն բաները, որ չի եղել: Եթե ուրիշ մարդ լինեի, ես էլ իրավունք կունենայի դատարան դիմելու։ Իմ ամուսինն ու ես վստահ էինք, որ չպետք է դրանց պատասխանել»,- ասաց նա՝ հավելելով, որ բոլորն էլ շատ լավ գիտեն՝ որ թերթերն են դրանք։ «Իհարկե, կան թերթեր, որոնք միակողմանի նյութեր չեն գրել: Ես շատ շնորհակալ եմ իրենց»,- հավելեց Ն. Սարգսյանը։
