Այսօր ԱԺ-ում ասուլիս էր հրավիրել ՀՅԴ խմբակցության ղեկավար Վահան Հովհաննիսյանը:
Անդրադառնալով հարյուր տոկոսանոց համամասնական ընտրակարգի թեմային՝ նա նկատեց, որ իրենք գիտակցում են՝ այդ պայքարում կարող են չհասնել հաջողության, և չի բացառվում, որ մեծամասնականով էլ թեկնածուներ առաջադրեն կամ պաշտպանեն ընդդիմադիր այլ թեկնածուի:
«Առաջին լրատվական»-ի հարցին` որքա՞ն տեղ է կանխատեսում ունենալ ՀՅԴ-ն ապագա խորհրդարանում, և եթե իրենց սպասելիքները չարդարանան` ընդդիմադիր ո՞ր ուժերի հետ են համագործակցության եզրեր տեսնում, Վ. Հովհաննիսյանը պատասխանեց՝ դեռ վաղ է խոսել այդ համագործակցության մասին, բայց մյուս կողմից՝ շատ հեշտ է գտնել դրա պատասխանը.
«Ով կանցնի խորհրդարանում, ովքեր կլինեն ընդդիմադիր և իշխանական կուսակցությունները, ինչպիսի դասավորություն կլինի` ըստ այդմ էլ մենք կկողմնորոշվենք, հիմա մենք այդ ուժերին ընտրել չենք կարող»:
Վ. Հովհաննսիյանը հավելեց նաև, որ իշխանափոխության են ձգտելու, հավաքելու են մաքսիմում ձայներ և ընդդիմադիր դաշտում էլ ձգտելու են առաջնայինը լինել:
«Առաջին լրատվական»-ը վկայակոչելով ՀՀ ԱԳ նախկին նախարար Վարդան Օսկանյանի հայտարարությունը, թե՝ ցանկալի կլիներ, որ բոլոր այն ուժերը, որոնք պաշտպանում են համամասնական մոտեցումը՝ «Բարգավաճ Հայաստան», ՀԱԿ, ՀՅԴ, «Ժառանգություն», Ժողովրդական կուսակցություն, «Ազատ դեմոկրատներ» և այլն, այս հարցի շուրջ առաջիկա խորհրդարանական լսումներից հետո այլևս ժամանակ չկորցնեն և այդ ընդհանուր մոտեցումը վերածեն քաղաքացիական շարժման, հարցրեց` ո՞ւմ հրահանգով էր այս հայտարարությունը արվել, և Ռ.Քոչարյանը կարո՞ղ է դառնալ քաղաքական նշյալ ուժերի համախմբողը.
«Նախ՝ դա քիչ հավանական եմ համարում: Հետո` կարող է այդ մարդը մի բան էլ ինքնուրույն է ասել, ինչի՞ եք կոնսպիրատիվ վերլուծությունների մեջ մտնում…
Բայց եթե ավելի լուրջ՝ սկզբից պետք է հասկանալ, թե ինչ տիպի շարժման մասին է խոսքը, ինչ ֆորմատ և օրակարգ է առաջարկում Վ. Օսկանյանը: Եթե դա քաղաքական կամ կազմակերպչական շարժում է` արդեն սկսվում են տարաձայնություններ, և պետք է արդեն քննարկել»,- նշեց Վ. Հովհաննիսյանը:
Վ. Հովհաննիսյանը չգիտի, թե Հրազդանի քաղաքապետի ընտրություններում ում է պաշտպանելու ՀՅԴ-ն: Նա լրագրողներին խորհուրդ տվեց այդ հարցով դիմել ՀՅԴ ԳՄ:
ՀՀԿ-ԲՀԿ վեճին հավատո՞ւմ է, թե՞ սա ընդամենը պաշտոններ բաժանելու կռիվ է՝ լրագրողների հարցին դաշնակցական գործիչը պատասխանեց.
«Վաղ թե ուշ գաղափարական տարաձայնությունները առաջանալու են` անկախ նրանից, թե ինչից է սկսվում կռիվը: Որովհետև հարց է առաջանում՝ ինչո՞ւ ես դու ուզում ինձնից շատ ներկայացված լինել, եթե ինձ նման ես. վաղ թե ուշ առաջանալու է այդ գաղափարական տարաձայնությունը, և արդեն առաջանում է… Սպասենք` տեսնենք»: