Թուրքական Hürriyet թերթի փոխանցմամբ՝ «Էրգենեկոն»-ի գործը քննող՝ հատուկ լիազորություններ ունեցող Ստամբուլի հանրապետական դատախազ Ջիհան Քանսըզը ավարտել է մոտ մեկ ամիս առաջ կալանքի տակ վերցված Թուրքիայի զինված ուժերի Գլխավոր շտաբի 26-րդ (2008-2010) պետ, բանակի պաշտոնաթող գեներալ Իլքեր Բաշբուղի նկատմամբ սկսած հետաքննությունը:
Գործող կառավարությունը տապալելու փորձ ձեռնարկելուց բացի, Բաշբուղին հավելվել է ահաբեկչական կազմակերպության ղեկավար հանդիսանալու մեղադրանքը: Այդ 39 էջանոց մեղադրականում պահանջվում է ահաբեկչական կազմակերպության ղեկավար հանդիսանալու համար Բաշբուղին ազատազրկել մինչև 22.5 տարով, իսկ գործող կառավարությանը տապալելու փորձի և չինովնիկների աշխատանքն ամբողջովին կամ մասամբ խոչընդոտելու համար՝ ցմահ ազատազրկում:
Դատարանը 15 օրվա ընթացքում պետք է կայացնի իր դատավճիռը:
Հիշեցնենք, որ կալանքի տակ առնվելուց հետո Բաշբուղը հերքել էր իր նկատմամբ ներկայացված մեղադրանքները՝ հայտարարելով, որ վատ նպատակներ չի հետապնդել, և եթե ցանկանար տապալել գործող կառավարությունը, ապա դրա համար իր տրամադրության տակ կար 700,000 զինծառայող, և ոչ թե այդ նպատակով կստեղծեր հակակառավարական ինտերնետային կայքեր:
