Մեդիամագնատ Ռուպերտ Մերդոկի News Corporation ընկերությունը հայտարարել է, որ Dow Jones & Company ֆինանսական ինֆորմացիայի առաջատար գործակալության ղեկավարի պաշտոնում նշանակվել է Լեքս Ֆենվիկը: Այս մասին ասվում է News Corporation-ի (որի մեջ է մտնում Dow Jones-ը) մամուլի հաղորդագրության մեջ:
Ֆենվիկը, որը վերջին 25 տարիներին ղեկավար պաշտոններ է զբաղեցրել Bloomberg գործակալությունում, նոր պաշտոնին կանցնի փետրվարի 13-ից,- գրում է The Independent թերթը:
«Լեքսն արդեն ավելի քան 2 տասնամյակ առաջատար ուժ է ֆինանսական և արդյունաբերական լուրերի շուկայում: Նրա ղեկավար ունակությունները անգնահատելի են Dow Jones-ի համար թվային տեխնոլոգիաների ժամանակներում»,- ասվում է ընկերության մամուլի հաղորդագրության մեջ:
Ֆենվիկը նոր պաշտոնում կփոխարինի Մերդոկի աջ ձեռք համարվող Լես Հինտոնին։
