«Երկիր»-ը գրում է. «Ինչպես երևում է` պապու խրատներն այնքան ուժեղ ազդեցություն են ունեցել մեր վարչապետի վրա, որ նա շարունակում է իր գործունեության սկզբունքներն ու վարքագիծը մտովի համաձայնեցնել դրանց հետ:
Բոլորը հիշում են՝ երկու տարի առաջ, հենց այս օրերին բարձրացված աղմուկը մի իրադարձության շուրջ, որը բավականին լայն տարածում ունի պետական բոլոր մարմիններում: Խոսքը Պետեկամուտների կոմիտեի տարեվերջյան խնջույքի և դրա ընթացքում բաժանված արժեքավոր նվերների ու դրա հետ կապված վարչապետի «զայրույթի» մասին է»,- ապա թերթը հավելում է.
«Այն ժամանակ Տիգրան Սարգսյանը «անկեղծորեն» զայրանում էր, թե ինչպես կարելի է պետական միջոցների հաշվին գերատեսչական միջոցառում կազմակերպել և նվերներ բաժանել աչքի ընկած աշխատակիցներին:
Անցել է երկու տարի: ՊԵԿ-ում, ինչպես բոլոր այլ կազմակերպություններում, խնջույքները նույն հաջողությամբ կայանում են, նվերներն էլ շարունակում են բաժանվել: Բայց աղմուկ չկա, վարչապետն էլ չի զայրանում: Իսկ ի՞նչն է փոխվել: Բանն այն է, որ այդ միջոցառումներին արդեն հրավիրվում է նաև Տիգրան Սարգսյանը, իսկ մեր մեծերն ասում են, որ ում հետ որ հաց ես կիսում, նրա հետ ունեցած «թյուրիմացությունները» մոռանում ես»:
