ՌԴ անվտանգության ծառայության նախկին սպա Ալեքսանդր Լիտվինենկոյի հայրը՝ Վալտեր Լիտվինենկոն, անսպասելի որոշել է ներողություն խնդրել Ռուսաստանից: Նրա որդին 2006 թ. խորհրդավոր պայմաններում մահացել էր Լոնդոնում: Հայրն այս տարիների ընթացքում որդու մահվան մեջ մեղադրում էր Ռուսաստանին:
Առաջին ալիքին տված հարցազրույցի ժամանակ հայրը խոստովանել է, որ ինքը սխալվել է՝ ավելացնելով, որ հակառուսական դիրքորոշումը պայմանավորված էր նրանով, որ ինքը չգիտեր ճշմարտությունը «դավաճան որդու» մասին:
Վալտեր Լիտվինենկոն ռուսական իշխանություններից խնդրել է թույլ տալ վերադառնալ հայրենիք: Նա շատ ծանր պայմաններում ապրում է Իտալիայում:
«Իմ հայրենիք, ների՛ր ինձ, ի սեր Աստծո, և օգնի՛ր ինձ վերադառնալ իմ երկիր»,- ասել է Վ. Լիտվինենկոն։
