Ընտրակեղծիքների բացառման նպատակով «Ազատ դեմոկրատներ» կուսակցությունը պատրաստ է համագործակցել քաղաքական տարբեր ուժերի հետ: Այսօր լրագրողների հետ հանդիպմանն այս մասին ասաց կուսակցության անդամ Ալեքսանդր Արզումանյանը:
«Ոչ մենք, ոչ էլ «Ժառանգություն»-ը չենք բացառել, որ կարող ենք հանդես գալ միասնական թիմով, սակայն այդ հարցի առնչությամբ վերջնական որոշում այս պահին չկա, մենք դեռ բանակցությունների մեջ ենք: Միաժամանակ, անպայման համագործակցելու ենք ընտրակեղծիքների վերահսկման և այլ հարցերի շուրջ, բայց թե համագործակցությունը կվերաճի՞ գաղափարական դաշինքի՝ կերևա մոտակա շաբաթներին»,- նշեց նա:
Անդրադառնալով «Ժառանգության», ՀՅԴ-ի ու ԲՀԿ-ի` հարյուր տոկոսանոց համամասնական ընտրակարգի անցնելու համատեղ առաջարկին` Արզումանյանը նշեց, որ այնքան էլ վստահ չէ, թե առաջարկը կանցնի ԱԺ-ում:
«Սա պարզապես սկզբունքի հարց է: Մենք գիտակցում ենք, թե օլիգարխները ինչ քայլեր են կիրառելու մեծամասնական ընտրակարգի կիրառման դեպքում: Մարդկանց համար կարևոր է, որ իրենց ձայնը տեղ հասնի: Իսկ մեծամասնական ինստիտուտը գալիս և գողանում է ժողովրդի ձայները, դրա համար էլ համամասնականին անցում կատարելը շատ կարևոր է: Ինչևէ, ամեն բան պարզ կլինի փետրվարի 15-ին ծավալվելիք լսումներից հետո»,- ասաց նա:
Ամփոփելով` «Ազատ դեմոկրատներ»-ի անդամը վստահություն հայտնեց, որ առաջիկա խորհրդարանական ընտրություններից հետո ընդդիմադիր դաշտը նոր ԱԺ-ում ակնհայտորեն ավելի լայն ներկայացվածություն կունենա:
«Ինչ խորհրդարան էլ ձևավորվի, նախորդից մեկ քայլ առաջ է լինելու, և այդ խորհրդարանում լավագույնս ներկայացված լինելու համար մենք` ընդդիմությունը, պետք է պաշտպանենք մեզ տրված յուրաքանչյուր ձայն»,- ընդգծեց Արզումանյանը:
