Ինչպես այսօր կառավարության նիստից հետո բրիֆինգում հայտնեց ՀՀ էկոնոմիկայի նախարար Տիգրան Դավթյանը, նախատեսվել է մի քանի ոլորտային ազատ տնտեսական գոտիների ձևավորում, որոնցից առաջինի մասին որոշումն այսօր կայացվեց: Գոտին նախատեսվում է «Մարս» գործարանի և Երևանի մաթեմատիկական ԳՀԻ տարածքում, որտեղ լինելու է միասնական տնտեսական համակարգ. «Մարս»-ում կլինի արտադրական բազան, իսկ ԳՀԻ-ում` գիտական:
Առաջին փուլում նախատեսվում է 10 մլն դոլարի ներդրում, և, ըստ նախարարի, կհամապատասխանեցվեն այդ տարածքները այն պահանջներին, որ սահմանել է կառավարությունը. դրանք և՛ ենթակառուցվածքներն են, և՛ մաքսային պայմանները:
«Ծրագիրը պետք է իրականացվի շուրջ վեց ամսվա ընթացքում: Դրանից հետո ակնկալում ենք կոնկրետ ներդրող ընկերությունների մասնակցությունը այդտեղ: Միանգամից ասեմ` չի լինելու տեղաշարժ այն ընկերությունների, որ գործում են ՀՀ-ում: Այնտեղ ակնկալում ենք նոր, օտարերկրյա կապիտալի մասնակցությամբ ընկերություններ»,- հայտարարեց Տ. Դավթյանը:
Սիտրոնիքսը լինելու է ազատ գոտու կառավարիչը: Տ. Դավթյանը նշեց՝ ակնկալում են, որ այդ գոտում բավականին լուրջ ներդրումներ կլինեն առաջիկա տարիներին, բավականին շատ աշխատատեղեր կբացվեն, և այն էական ազդեցություն կունենա երկրի տնտեսական զարգացման համար:
«Գործընթացը սկսվեց»,- եզրափակեց նախարարը:
