Եթե գալիք ընտրություններում մեկ տեղամասի լրացուցիչ ցուցակներում ընդգրկվեն 50-100 ընտրող, ապա փաստը մտահոգիչ կլինի: «Առաջին լրատվական»-ի հետ զրույցում նման տեսակետ հայտնեց «Ընտրությունը քոնն է» ՀԿ նախագահ Հարություն Համբարձումյանը`անդրադառնալով երկքաղաքացիների ընտրելու իրավունքին գալիք ընտրությունների ժամանակ:
Նա հիշեցրեց, որ արտերկրում գտնվող ՀՀ քաղաքացիները զրկված են ընտրելու իրավունքից: Քվեարկությանը կարող են մասնակցել միայն դեսպանատան աշխատողները: «Պետք է գան Հայաստան, ընդգրկվեն լրացուցիչ ցուցակներում: Եթե այդ լրացուցիչ ցուցակներում տեղ գտնեն 15-20 հոգի, դա ընդունելի է, բայց եթե լրացուցիչ ցուցակներում ընդգրկվեն մոտավորապես 50-100 մարդ, ապա դա մտածելու տեղիք կտա: Ինչպես կարող են մարդիկ թողնեն իրենց աշխատանքը, ընտանիքը և ընտրության համար վերադառնան Հայաստան»,- ասաց ՀԿ նախագահը: Նման երևույթը նա որակեց աբսուրդ:
«Ընտրությունը քոնն է» հասարակական կազմակերպության 35 ներկայացուցիչներ դիտորդական առաքելություն կիրականացնեն գալիք ընտրություններին: Նրանք մասնակցել են դիրտորդական առազելություն իրականացնելու իրավունք տվող դասընթացներին և ստացել են համապատասխան վկայականներ: Ըստ Համբարձումյանի, իրենց կազմակերպությունը մասնակցել է այդ դասընթացներին, որպեսզի հետագայում կազմակերպության մասնագետներն իմանան, թե ինչ հարցեր պետք է ուսումնասիրվեն դիտորդների համար ուսուցումներ կազմակերպելիս:
Համբարձումյանի խոսքերով, իրենց ՀԿ-ն չի սատարում ոչ մի քաղաքական ուժի: «Դա բացառվում է, որովհետև այդ դեպքում մեր դիտորդական առաքելության իմաստը կորում է: Դիտորդական կազմակերպությունները պետք է լինեն անկողմնակալ: Եթե որևէ հասարակական կազմակերպություն սատարի որևէ թեկնածուի կամ կուսակցության, ապա ԿԸՀ-ն կարող է անվավեր համարել և զրկել տվյալ կազմակերպությանը դիտորդական իրավունքից»,- ասաց «Ընտրությունը քոնն է» ՀԿ նախագահը:
Այն հարցին, որ նախորդ ընտրությունների ժամանակ չե՞ն եղել դիտորդական կազմակերպություններ, որոնք սատարել են այս կամ այն քաղաքական ուժին, պատասխանեց, որ եղել են: «Եղել են կազմակերպություններ, որոնք, իրականացնելով դիտորդական առաքելություն, սատարել են նախագահի թեկնածուի, բայց, ցավոք սրտի, ԿԸՀ-ն ժամանակին չի կանխել նման դեպքերը և օրենքով նախատեսված դրույթը չի կիրառել»,- ասաց Հարություն Համբարձումյանը:
