ԲՀԿ-ական պատգամավոր Վարդան Բոստանջյանի հայտարարությունը, թե «Բարգավաճ Հայաստանը» չունի նախագահական ընտրություններում Սերժ Սարգսյանին չսատարելու առիթ, ըստ էության հանդիսանում է արձանագրումը այն փաստի, որ նախօրեին տեղի ունեած կոալիցիայի խորհրդի նիստում Սերժ Սարգսյանին հաջողվել է հնազանդության հերթական պաշարը ներարկել ԲՀԿ-ին:
Վարդան Բոստանջյանն, իհարկե, դիվանագիտորեն փորձել է այդ հայտարարությունը վերագրել իրեն՝ ասելով, որ չի խոսում կուսակցության նախագահ Ծառուկյանի անունից, սակայն պարզ է, որ «Բարգավաճ Հայաստանում» ամենազգուշավոր պատգամավորներից մեկը հանդիսացող Բոստանջյանը այդ կարգի պատասխանատու հայտարարությունը, այն էլ՝ ՀՀԿ-ԲՀԿ հակադրության գերագույն լարման փուլում, չէր անի առանց համոզվածության, որ կուսակցության նախագահը առնվազն չի դժգոհի դրանից: Պարզապես, Գագիկ Ծառուկյանն, ըստ երևույթին, Սերժ Սարգսյանից հաջողացրել է ձեռք բերել համաձայնություն, որ նման կարգի հայտարարություններն անձամբ չի անի:
Այլ կերպ ասած՝ «Բարգավաճն» այս փուլում կշարունակի կտրուկ գործողություններ չանել և մնալ Սերժ Սարգսյանին հնազանդ, բայց ԲՀԿ նախագահ Գագիկ Ծառուկյանը դա անձամբ չի անի, այլ իր կուսակիցների շուրթերով: Ըստ ամենայնի, ներկայիս փուլում Սերժ Սարգսյանի համար դա էական հարց չէ, առավել ևս, որ հիմարներ չկան, և որևէ մեկը չի կարող մոլորության մեջ լինել և մտածել, որ ասենք՝ Վարդան Բոստանջյանը սատարում է Սերժ Սարգսյանին, իսկ Գագիկ Ծառուկյանը՝ ոչ:
Բայց կասկած չկա նաև, որ ինչ-որ փուլում Սերժ Սարգսյանը Գագիկ Ծառուկյանի առաջ դնելու է անձամբ հավաստիացնելու, այսինքն՝ սատարման մասին անձամբ հայտարարելու խնդիր: Այսինքն՝ այդ ուղտը վաղ թե ուշ չոքելու է ԲՀԿ առաջնորդի դռանը: Ավելին՝ դա երևի թե ինչքան ուշ լինի, այնքան ավելի խայտառակ ձևով է Գագիկ Ծառուկյանը դուրս գալու այդ իրավիճակից: Հետևաբար, ճիշտ կլինի չթողնել այդ բեռը Վարդան Բոստանջյանի կամ այլ ԲՀԿ-ականների ուսերին, ու հենց այժմ էլ հայտարարել Սերժ Սարգսյանին սատարելու մասին: Սակայն այստեղ, իհարկե, հնարավոր են նաև որոշակիորեն անսպասելի նյուանսներ:
Բանն այն է, որ Սերժ Սարգսյանին միգուցե ներկայումս պետք էլ չէ, որ Գագիկ Ծառուկյանը այսպես միանգամից, այսքան արագ և շուտ հայտարարի կապիտուլյացիայի մասին, քանզի Սարգսյանին ԲՀԿ հետ լարվածությունն ու հակադրությունը ինչ-որ առումով կարող է պետք լինել նաև Հանրապետականի տարբեր ներկայացուցիչների կամ խմբերի բռի մեջ պահելու համար՝ ԲՀԿ-ն օգտագործելով որպես դիմահար վտանգ: Ի վերջո, մենք բազմիցս նշել ենք, որ Սարգսյանի ներիշխանական գլխավոր խնդիրը ոչ թե ԲՀԿ-ում է, այլ ՀՀԿ-ում, և ԲՀԿ-ն տվյալ պարագայում ընդամենը կարող է գործիք դառնալ ՀՀԿ-ում եղած խնդիրները լուծելու համար: Այդ իսկ պատճառով էլ Սերժ Սարգսյանին, ըստ երևույթին, ներկայումս պետք չէ շտապել և Գագիկ Ծառուկյանի հայտարարություն կամ ստորագրութուն կորզել, քանի դեռ ՀՀԿ-ում բոլոր հարցերը չէ, որ Սարգսյանն իր համար լուծել է:
Լուսանկարը` Bravo.am-ի
