Պրադո թանգարանի նկարների վերանորոգման աշխատանքով զբաղվող մասնագետները հայտնաբերել են Լեոնարդո դա Վինչիի «Մոնա Լիզա» նկարի ամենավաղ կրկնօրինակը, որը, ինչպես ենթադրվում է, նկարել է նրա աշակերտներից մեկը դա Վինչիի աշխատասենյակում: Ինչպես գրում է The Art Newspaper-ը, ավելի վաղ ենթադրվում էր, որ Մադրիդի թանգարանում պահվող նկարը ստեղծվել է Լեոնարդոյի մահից հետո:
Հայտնի են օրիգինալ «Մոնա Լիզայի» 16-17-րդ դարերին թվագրվող տասնյակ կրկնօրինակներ, որոնք պահվում են Լուվրի թանգարանում: Ենթադրվում էր, որ Պրադոյի թանգարանի նկարը նկարվել է ավելի վաղ, սակայն մեծ հետաքրքրություն չէր ներկայացրել հետազոտության համար, քանի որ նկարի հետևի պլանում բացակայում էր բնանկարը:
Մասնագետները հենց այդ «բացակայող» բնանկարն են հայտնաբերել սև ներկի և մգացած լաքի տակ, որոնք էլ աշխատանքի ընթացում վերացրել են: Հունվարի կեսերին նրանք հայտարարել էին, որ կտավի վրա մուգ գունավորումը հայտնվել է ավելի ուշ` 18-րդ դարի կեսերին:
Բացի այդ, ավելի վաղ համարում էին, որ մադրիդյան «Մոնա Լիզան» նկարվել է Հյուսիսային Եվրոպայում տարածված կաղնու տախտակի վրա, որը կարող էր մատնանշել ֆլամանդացի հեղինակի: Սակայն 2010 թվականին հետազոտողները եկել էին այն եզրակացության, որ տախտակը պատրաստել էին ընկուզենուց, որը նույպես կիրառվել է Իտալիայում:
Այն, որ կրկնօրինակը ստեղծվել է Լեոնարդոյի կյանքի օրոք՝ հաստատել են և Պրադոյում, և Լուվրում: Ֆրանսիացի գիտնականները ենթադրում են, որ կտավը նկարել է դա Վինչիի երկու աշակերտներից մեկը` կամ Սալային, կամ Ֆրանչեսկո Մելցին:
Պարբերականը նշում է, որ այս բացահայտումը թույլ կտա իմանալ Լեոնարդոյի «Մոնա Լիզայի» որոշ մանրամասներ, որը ավելի վատ է պահպանվել, քան կրկնօրինակը: Մասնավորապես, իսպանական նկարում ավելի լավ են երևում աթոռի դրվագները, զգեստի ծալաբոլորքը և կիսաթափանցիկ հյուսվածքը, որը ծածկում է Մոնա Լիզայի ձախ թևը:
