2011 թվականին Christie’s աճուրդի տան ժամանակակից արվեստի վաճառքը 2010 թվականի համեմատ ավելացել է 22 տոկոսով: Այս մասին հայտնում է Bloomberg-ը` վկայակոչելով աճուրդի տան տվյալները: Ընդհանուր առմամբ, ժամանակակից արվեստը Christie’s-ին բերել է 735,7 միլիոն ֆունտ (1,15 միլիարդ դոլար):
Ժամանակակից արվեստի պահանջարկի աճի շնորհիվ, որը կոլեկցիոներները սկսել են դիտել որպես ներդրում, Christie’s-ի վաճառքի ծավալն աճել է 9 տոկոսով: 2011 թվականին աճուրդի տունը վաճառել է 3.6 միլիարդ ֆունտ արժողությամբ արվեստի գործեր և հավաքածուների իրեր:
Ժամանակակից արվետսի թոփ-լոտերն էին Ռոյ Լիխտեյնշտեյնի, Էնդի Ուորհոլի և Մարկ Ռոտկոյի գործերը: Միևնույն ժամանակ, աճուրդի տունը հայտնել է իմպրեսիոնիստների և մոդեռնիստների արվեստի նկատմամբ հետաքրքրության անկման մասին. այս գործերի վաճառքը կրճատվել է 28 տոկոսով` մինչև 548.6 միլիոն ֆունտ: «Իմպրեսիոնիստների և մոդեռնիստների» շրջանում ամենաթանկ նկարիչը Պաբլո Պիկասոն էր, որի «Կապույտ զգեստով նստած կինը» կտավը վաճառվել է 28,9 միլիոն դոլարով:
2011 թվականի ավարտին Bloomberg-ի մասնագետները հաշվել էին, որ Christie’s և Sotheby’s աճուրդի տներում ժամանակակից արվեստի գործերի վաճառքի ընդհանուր գումարը կազմել է 1.7 միլիարդ դոլար: Sotheby’s-ը անցած տարվա ֆինանսական հաշվետվությունը պաշտոնապես կներկայացնի 2012 թվականի փետրվարին:
