ՄԱԿ-ի Անվտանգության խորհրդի նիստի ժամանակ, որում, ի թիվս այլ հարցերի, քննարկվում էր Սիրիայի նախագահ Բաշար Ալ-Ասադի հրաժարականի հարցը, սուր քննադատությամբ է հանդես եկել ՄԱԿ-ում Սիրիայի ներկայացուցիչ Բաշար Ջաֆարին:
Ինչպես հաղորդում է Al-Arabiya հեռուստաալիքը, Ջաֆարին հայտարարել է, որ Դամասկոսը պատրաստվում է դիմակայելու իր թշնամիներին, ինչպես նաև մեղադրել է արևմտյան երկրներին «երկակի ստանդարտների» և Սիրիայի շուրջ հակամարտություն ստեղծեու շուրջ: «Հնարավոր չէ միաժամանակ լինել հրդեհող և հրդեհ մարող»,- նշել է Ջաֆարին:
Արաբական պետությունների լիգայի ներկայացուցիչներն իրենց հերթին կոչ են արել ՄԱԿ-ի ԱԽ-ին պաշտպանել Ասադին տապալելու գաղափարը և վճռական գործողություններ ձեռնարկել Սիրիայում ճնշումները դադարեցնելու համար: Կատարի վարչապետ Համադ բին Ջասիմ Ալ-Թանին հայտարարել է, որ ԱՊԼ-ն վերջին 10 ամիսների ընթացքում փորձել է համաձայնության գալ Ասադի վարչակարգի հետ, սակայն նրա բոլոր փորձերը անիմաստ են անցել: Նրա խոսքերով՝ Սիրիայի իշխանությունների համար խնդիրը լուծելու միակ տարբերակը «սեփական քաղաքացիների սպանությունն է»:
ԱՊԼ գլխավոր քարտուղար Նաբիլ Ալ-Արաբին ընդգծել է, որ արաբական երկրները սիրիական ճգնաժամի ամբողջ ընթացքում փորձել են խուսափել այդ երկրի տարածք օտարերկրյա ուժեր մտցնելուց:
Սիրիայի դեմ բանաձև ընդունելու օգտին են արտահայտվել նաև Ֆրանսիայի ԱԳ նախարարը և ԱՄՆ պետքարտուղարը: Վերջինիս խոսքերով՝ ինչքան երկար Սիրիայի նախագահը պահի իշխանությունը, այնքան ավելի դժվար կլինի լուծել խնդիրը:
Իր հերթին, ՄԱԿ-ում Ռուսաստանի ներկայացուցիչ Վիտալի Չուրկինը պատմել է, որ Մոսկվան դարձյալ դիմել է Սիրիայի իշխանություններին և ընդդիմության ներկայացուցիչներին՝ հրավիրելով բանակցություններ վարել Սիրիայի տարածքում: Այս առաջարկությունը պաշտպանել է Չինաստանը:
Ավելի վաղ հաղորդվում էր, որ պաշտոնական Դամասկոսը համաձայնել է այդ բանակցություններին, սակայն ընդդիմությունը լիովին բացառում է նման հնարավորությունը:
