ՀՀ ԱԱԽՔ Արթուր Բաղդասարյանը Հայաստան է հրավիրել Ռուսաստանի ազգային անվտանգության խորհրդի քարտուղար Նիկոլայ Պատրուշևին:
«ժողովուրդ»-ի այս տեղեկությունը հաստատել է նաև ԱԱԽ մամուլի խոսնակ Հարություն Ամիրյանը՝ ավելացնելով. «ՀՀ ԱԱԽ-ի և ՌԴ-ի անվտանգության խորհրդի միջև համագործակցության ծրագիր է ստորագրվել Հայաստանում, և այդ ծրագրերի քննարկման համար պարբերաբար այցեր են լինում՝ աշխատանքային այցեր, պաշտոնական հանդիպումներ»:
«Ամիրյանը նշեց, որ դեռևս որոշված չէ, թե երբ է Պատրուշևը ժամանելու. «Հնարավոր է՝ 2-3 ամիս հետո»:
Այս այցի մեջ հետաքրքիրը ոչ միայն այն է, որ Պատրուշևը երկար տարիներ ղեկավարել է ՌԴ դաշնային անվտանգության ծառայությունը, այլ այն իրողությունը, որ հունվարի 24-ին ՀՀ վարչապետ Տիգրան Սարգսյանն ընդունեց «Ռոսսելխոզբանկ»-ի խորհրդի նախագահ Դմիտրի Պատրուշևին՝ Նիկոլայի որդուն: Կրտսեր Պատրուշևը մտադիր է Հայաստանում «Ռոսսելխոզբանկ»-ի ներկայացուցչություն և ագրոսերվիս հիմնել: Այսինքն՝ առաջիկայում իշխանական բիզնեսի մի նոր ճյուղ է բացվելու»,- հավելում է թերթը:
