Ցանկացած երկիր, այդ թվում` Հայաստանը, պատրաստ է ազատ առևտրի գոտի ստեղծելու: Սակայն, ինչպես «Առաջին լրատվական»-ի հետ զրույցում նշեց տնտեսագետ Գրիգոր Հայրապետյանը, խոսքn այն մասին է, թե որքանով այդ գոտին արդյունավետ և օգտակար կլինի երկրի համար:
«Ազդեցությունը գնահատելը բարդ է. պետք են լուրջ տնտեսական հետազոտություններ»,- նշեց Գ. Հայրապետյանը՝ հավելելով, որ ներկայում իրականացնում են նման ուսումնասիրություն, որի արդյունքները առաջիկայում պարզ կլինեն:
Նրա խոսքով՝ երկրների համար տեսականորեն լավ է ազատ առևտրի գոտին, այն ապահովում է ապրանքների ազատ տեղաշարժ, բայց ոչ բոլոր ազատ առևտրի համաձայնագրերն են տարբեր կողմերի համար ապահովում օգուտներ, նաև կարող են բացասական արդյունքներ լինել: Գ. Հայրապետյանի կարծիքով՝ բացասական կարող է լինել այն, որ մենք նույն վիճակում կշարունակենք մնալ, իսկ մյուս կողմն ավելի շատ օգուտներ կունենա:
Հիշեցնենք, որ փետրվարի 5-ին ավարտվում է Հայաստանի և Եվրոպական միության միջև խորը և համապարփակ ազատ առևտրի համաձայնագրի Հայաստանի կողմից բանակցությունների կատարված աշխատանքների վերջնական գնահատականի ժամկետը: Փետրվարի վերջին Բրյուսելում կայանալու է համապատասխան բարձրաստիճան կոմիտեի նիստը, որտեղ քննարկվելու է մեր երկրի` բանակցությունների մեկնարկին պատրաստ լինելու հարցը:
