«Հայաստան» հանրախանութի սեփականատեր Փայլակ Հայրապետյանի ներկայացուցիչներն այսօր փորձեցին «Ամերիաբանկ»-ի ներկայացուցիչներին համոզել, որ նրանք ազատեն իրենց վստահորդի սեփականությունը հանդիսացող տարածքը: Սակայն, բանկի աշխատակիցները հրաժարվեցին կամովին դա անել:
Փայլակ Հայրապետյանի ներկայացուցիչ, փաստաբան Արման Սարգսյանը «Առաջին լրատվական»-ի հետ զրույցում ասաց, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանն այսօր բավարարել է իրենց միջնորդությունը և արգելել է «Ամերիաբանկ» ՓԲԸ-ին և այլ անձանց «Հայաստան» հանրախանութի անշարժ գույքի օտարման կամ իրացման հետ կապված գործողություններ կատարել: Հենց այս որոշման հիման վրա էլ Փայլակ Հայրապետյանի փաստաբանները սկսեցին բանակցություններ վարել «Հայաստան» հանրախանութի առևտրի կենտրոնի 3-րդ հարկում գտնվող «Ամերիաբանկ»-ի ներկայացուցիչների հետ: Փաստաբանները շեշտում էին. «Ունենք դատարանի որոշում, որը ենթակա է կատարման»: Սակայն «Ամերիաբանկ»-ի իրավաբանական վարչության պետը պահանջեց ԴԱՀԿ որոշում:
«Կա դատարանի որոշում, որ արգելադրված գույքը հանձվի Փայլակ Հայրապետյանի տնօրինությանը և չխոչընդոտվի նրա տիրապետմանը: Բանկի աշխատակիցներն անհայտ պատճառներով առայժմ չեն ցանկանում կամավոր կատարել, պահանջում են, որպեսզի որոշումը կատարվի հարկադիր ծառայության միջոցով»,- ասաց Ա. Սարգսյանը:
Ըստ վերջինիս՝ երեկ իրենք դիմել են հարկադիր ծառայությանը, որն առայժմ չի եկել: Այն հարցին, թե ինչ գործողությունների կդիմեն իրենք, եթե հարկադիրը չներկայանա, փաստաբանը պատասխանեց, որ հնարավոր է տարածքում մնան և դուրս չգան մինչ դատական ակտի կատարումը: Սարգսյանի կարծիքով փորձ է արվում դատական ակտի կատարումը հնարավորինս հետաձգել, որպեսզի բանկը հնարավորություն ստանա դատական ակտը բողոքարկել:
Հիշեցնենք, որ հունվարի 25-ից «Ամերիաբանկ»-ը բռնագրավել է իր մոտ գրավադրված «Հայաստան» հանրախանութի տարածքի մի մասը:
