«Սարդարապատ» շարժման նախաձեռնող խմբի անդամ, Շուշիի առանձնակի գումարտակի հրամանատար Ժիրայր Սեֆիլյանն անիմաստ և ավելորդ է համարում խորհուրդ տալ այս իշխանություններին` ինչ անել, որպեսզի հայկական բանակն ավելի ուժեղ ու կազմավորված դառնա: Այս մասին նա հայտարարեց այսօր կայացած մամուլի ասուլիսի ժամանակ:
«Բանակում կատարվող կոսմետիկ փոփոխությունները փոփոխություններ չեն, մեզ հիմնավոր բարեփոխումներ են անհրաժեշտ: Բանակի 20-ամյակը պետք է պատճառ դառնա ոչ թե խնջույքներ անելու, այլ մտորելու` ինչ անել այն ավելի կայացնելու, դիրքերն ամրապնդելու համար»,- տեսակետ հայտնեց Սեֆիլյանը:
Անդրադառնալով ներքաղաքական դաշտի զարգացումներին` վերջինս նշեց, որ Հայաստանում երկար տարիներ է` քաղաքական գործընթացներ գոյություն չունեն:
«Գոյություն ունեն բռնատիրական կարգեր և բռնատեր, որ բոլորին իր կամքն է պարտադրում: Նրանք, ովքեր ընդունել են բռնատերի կանոնները, օժանդակում են նրա լեգիտիմացմանը: Դրա համար էլ լուծումներ պետք է փնտրել քաղաքական նոր դաշտում, որն արդեն իսկ ձևավորվում է: Փոքրիկ օջախների ուժերի համադրմամբ մեզ հաջողվելու է ազատվել այս իշխանություններից և ժողովրդին այլընտրանք առաջարկել:
Մենք արհամարհում ենք այս խեղկատակ իրավիճակը և զբաղված ենք նոր իշխանությունների ձևավորմամբ: Այդ է պատճառը, որ «Սարդարապատ» շարժումը չի մասնակցելու առաջիկա ընտրություններին: Մենք մասնակցելու ենք ընտրությունների, բայց միայն այս վարչակարգի տապալումից հետո: Մեզ հաջողվելու է իրականացնել մեր գլխավոր խնդիրը, և մենք այս ժամանակն օգտագործելու ենք, որպեսզի թույլ չտանք` կյանքի կոչվի այն կարգախոսը, որ հեղափոխությունները միշտ անում են ռոմանտիկները, իսկ իշխանության գալիս են տականքները»,- ամփոփեց Ժիրայր Սեֆիլյանը:
