ԱՄՆ-ում դատարանը պարտավորեցրել է աննախադեպ չափի փոխհատուցում վճարել կեղծ մեղադրանքով բանտում 15 տարի անցկացրած ամերիկացուն: Բանտում անցկացրած յուրաքանչյուր տարվա համար ամերիկացին կստանա ավելի քան 1 մլն դոլար:
Ինչպես հաղորդում է The Huffington Post-ը, Իլինոյս նահանգի Չիկագո քաղաքի դաշնային դատարանը կարգադրել է 32-ամյա Թեդեուս Խիմենեսին վճարել 25 մլն դոլար փոխհատուցում:
1993թ. 13-ամյա Թեդեուս Խիմենեսը ձերբակալվել էր 19-ամյա Էրիկ Մորոյի սպանության կասկածանքով: Դատավարության ժամանակ նա մեղավոր էր ճանաչվել և դատապարտվել 45 տարվա ազատազրկման: Սակայն 2009թ. վկաներից մեկը հրաժարվել է դատավարության ժամանակ տված իր ցուցմունքներից, իսկ ավելի ուշ 16-ամյա վաղեմության սպանության համար իր մեղքը խոստովանել է Ինդիանա նահանգի բնակիչ Խուան Կառլոս Տորեսը:
2009թ. մայիսին Թեդեուս Խիմենեսին ազատ են արձակել: 2010թ. Խիմենեսի գործը վերանայվել է և նրա վրայից վերջնականապես հանվել են բոլոր մեղադրանքները: Դա հնարավորություն է տվել քաղաքի իշխանություններից փոխհատուցում պահանջել:
Խիմենեսի փաստաբանը նշել է, որ իր պրակտիկայում 25 միլիոնն ամենամեծ գումարն է, որ երբևէ տրվել է որպես փոխհատուցում:
