Թուրքական Cumhurriyet թերթին տված հարցազրույցում Թուրքիայի էներգետիկայի ու բնական պաշարների նախարար Թաներ Յըլդըզն անդրադարձել է Հորմուզի նեղուցի հնարավոր փակման շուրջ առաջացած լարված իրավիճակին.
«Չեմ կարծում, որ Իրանը կփակի Հորմուզի նեղուցը։ Մեր իրանցի եղբայրները նույնպես չեն ցանկանում տարածաշրջանում լարվածության առաջացում, սակայն նրանք անհանգստացած են հնարավոր պատժամիջոցների սահմանումից։ Ի պատասխան դրա՝ նրանք հայտարարում են, որ կփակեն Հորմուզի նեղուցը։
Վերջին շրջանում կողմերը (ԱՄՆ-ը և Իրանը) բավական մեղմացրել են իրենց դիրքորոշումը տվյալ խնդրի շուրջ՝ հասկանալով, որ պատերազմի միջոցով անհնար է հասնել իրենց նպատակներին։ Իրանի հանդեպ պատժամիջոցները ցայժմ հանդիսանում են տևական վեճերի առարկա։
Իրանը Թուրքիայի հարևան և գործընկեր երկիրն է, ինչի համար էլ Թուրքիան պետք է գործի երկկողմանի հարաբերությունների շրջանակներում։ Թուրքիան ու Իրանը կարող են համատեղ իրագործել բազմաթիվ հետաքրքիր նախագծեր»։
Հիշեցնենք, որ նախորդ տարվա նոյեմբերի վերջին թուրքական կողմը տվել էր դեպի Եվրոպա թուրքական տարածքով իրանական գազի տարանցման հարցում իր նախնական համաձայնությունը։ Եվրոպային իրանական գազամատակարարումները մեկնարկելու են 2014 թվականից, երբ Իրանում կկրկնապատկվի գազի արդյունահանումը։ Իրանը Թուրքիայի տարածքով տարեկան 35 միլիարդ խորանարդ մետր գազ է առաքելու Եվրոպա։ Այդ նպատակով կառուցվելու է նոր գազատար, որի 1720 կիլոմետրանոց հատվածն անցնելու է Թուրքիայի տարածքով։
