Ոստիկանապետ Վլադիմիր Գասպարյանը խոստանում է «շատ բարեփոխումներ» և որակական փոփոխություններ: Այսօր լրագրողների հետ ճեպազրույցի ժամանակ նա նշեց, որ գործընթացը սկսվել է, շուտով ամբողջ քաղաքում կտեղադրվեն տեսառադարներ, որոնց միջոցով գոնե Երևանում կվերանա «ավտոտեսուչ» հասկացությունը: Դրանք կվերածվեն պարեկային ծառայությունների, որոնք ծառայություն կիրականացնեն բակերում, որտեղ ժողովուրդը ոստիկանների ավելի շատ կարիք ունի:
«2012 թ. առաջին կիսամյակում կավարտենք աշխատանքները Երևանում: Այդ ամբողջ ստորաբաժանումները դուրս կգան ավելի պիտանի ծառայության: 2 ամսից կցուցադրենք արտաքին ծառայության սպայական ստորաբաժանումը, որը կտիրապետի հոգեբանական գիտելիքների, օտար լեզուների, բժշկական հմտությունների»,- ասաց Վ. Գասպարյանը՝ հավելելով, որ գումարտակն արդեն ստեղծված է, դասընթացներ են անցկացվում ակադեմիայում, մոտ ապագայում՝ եթե ոչ տարեվերջին, ապա մինչև մյուս տարվա գարնանն ամբողջ պահակապարեկակետային գունդը կբերվի այդ որակի:
«Վստահ եմ, որ առողջ օրգանիզմը պետք է իր միջից վանի բացասական երևույթները: Տեսանելի և կարճ ժամանակում որակական փոփոխությունն ակնհայտ կլինի»,- վստահեցրեց ոստիկանապետը:
Անդրադառնալով թմրամոլության կասկածանքով ԲՀԿ անդամների ձերբակալություններին՝ ոստիկանապետը տեղեկացրեց, որ բոլոր ձերբակալությունները շարունակվում են, ոստիկանությունը չի գնում կուսակցությունների ու անձերի ետևից, այլ գնում է երևույթների ետևից, և «բացարձակապես նշանակություն չունի` որ կուսակցության, որ խավի, որ հաստության մարդիկ են»:
Ըստ նրա՝ նշանակություն ունի այն, թե ինչ են արել այդ մարդիկ: «Ուռկանը գցված է, ես չգիտեմ` ինչ դուրս կգա: Միջպետական միջոցառում էր անցկացվում` կապված նարկոմաֆիայի հետ: Հիմա բնակարանային գողությունների և հետախուզվողների ուռկանն է գցված»,- նշեց Վ. Գասպարյանը ու հայտարարեց. «Ես քաղաքականությունից դուրս եմ: Ես այն գիծն եմ, որ անցնում է ընդդիմության, իշխանության, քաղաքականության, բոլորի միջև»:
Պատասխանելով հարցին` ինչպե՞ս է վերաբերվում նախկին ոստիկանապետ Ալիկ Սարգսյանի հայտարարություններին, թե` հեղափոխությունը կխեղդի օրորոցում, Վ. Գասպարյանը նկատեց, որ հեղափոխություն արել է 1 անգամ՝ 1989 թվականին, 2-րդ հեղափոխություն չի ակնկալում և վստահ է, որ բնականոն, խաղաղ զարգացում է լինելու. «Օրորոցում խեղդելու մազոխիստական բաներով չեմ տառապում»:
Միաժամանակ Վ. Գասպարյանը հայտարարեց, որ իր կենսագրության ընթացքում քաղաքական պատվերներ չի ունեցել. «Իմ վերևում միայն նախագահն է: Նախագահը իմ առջև խնդիր է դրել՝ վերադարձնել ժողովրդի վստահությունը, վերադարձնել համազգեստից վերցված պատիվը, «Միլիցա-պեպելնիցա» ասվածն այն մասին էր, որ ես իմ աշխատակազմին եմ ասել՝ տղե՛րք, մենք կորցրել ենք մեր հեղինակությունը, ոստիկանությունը վերածել ենք զբոսաշրջիկների, անշարժ գույքերի, վաշխառուների, քյոխվաների ապարատի: Մեր երեխաների մասին պետք է մտածենք»:
