Կարևոր չէ ` համամասնական, թե մեծամասնական ընտրակարգերով կանցկացվեն առաջիկա խորհրդարանական ընտրությունները, կարևորը լավ ընտրություններ կազմակերպելն է: Այսօր լրագրողների հետ հանդիպմանը ասաց ՀՀԿ-ական պատգամավոր Կարինե Աճեմյանը:
«Արդար, թափանցիկ, եվրոպական չափանիշներին համապատասխան ընտրություններ ունենալու համար մենք պետք է կամք դրսևորենք, համապատասխան աշխատանքներ տանենք: Ես շատ մեծ ցանկություն ունեմ, որ այս ընտրություններում կարողանանք քաղաքական մշակույթի տարրեր ձևավորել:
Մեծամասնական ընտրակարգի մեջ միայն բացասական բան տեսնելը ճիշտ չէ, քանի որ այդ ընտրակարգով ընտրված պատգամավորներն իրար հետ ավելի սերտ են աշխատում»,- ասաց պատգամավորը:
Հայ ազգային կոնգրեսի ներկայացուցիչ, Սոցիալ-դեմոկրատ հնչակյան կուսակցության ատենապետ Լյուդմիլա Սարգսյանն իր հերթին նկատեց, որ հարյուր տոկոսանոց համամասնական ընտրակարգի վերաբերյալ ՀՀԿ-ի տրամադրություններն արտահայտությունն են այն բանի, որ վերջինս մտավախություն ունի, թե դրա ընդունման դեպքում անկարող կլինի վերահսկել ընտրությունների ընթացքը այնպես, ինչպես ինքն է ցանկանում:
«Եթե ձեր կուսակցության մեջ կա ժողովրդավարություն, եթե դուք ուզում եք երկրի զարգացմանն ուղղված քայլեր անել, վատ չէր լինի, եթե աջակցեիք ՀՅԴ-ի և «Ժառանգության»` հարյուր տոկոսանոց համամասնական ընտրակարգի անցնելու նախաձեռնությունը: Եթե ձեր տրամադրությունների մեջ անկեղծ եք, բարի եղեք նպաստել նրանց այդ առաջարկի ընդունմանը»,- ասաց Լյուդմիլա Սարգսյանը:
Ըստ ՍԴՀԿ ատենապետի` իշխանություններն այնքան էլ ազնիվ չեն ազատ ու արդար թափանցիկ ընտրություններ անցկացնելու իրենց խոստումներում:
«Փորձը ցույց է տվել, որ իշխանությունները նման խոսքերով գնացել են ընտրությունների, սակայն դրանց արդյունքները կեղծվել են, բռնություններ են գրանցվել: Հերթական բոլոր ընտրությունները կեղծվում են` օգտագործելով կրիմինալը, սափրագլուխներին: Ես ինքս եմ մի քանի տարի առաջ ականատես եղել դրան»,- ասաց ՀԱԿ ներկայացուցիչը:
