Սիրիայի նախագահ Բաշար Ալ-Ասադը չորեքշաբթի առավոտյան անսպասելիորեն հայտնվել է Դամասկոսի կենտրոնում՝ Օմայանների հրապարակում հավաքված իր հազարավոր կողմնակիցների շրջանում: Այս մասին հաղորդում է РИА Новости-ն՝ վկայակոչելով տեղի հեռուստաալիքները:
«Ես ձեզ հետ եկել եմ այս ցույցին՝ Դամասկոսի Օմայանների հրապարակ, որը համարվում է ազատության, դիմակայության, պատմության և մեր ազգային հպարտության հրապարակը: Ես ուզում եմ ձեզ հետ լինել, քանի որ ձեզնից մեկն եմ: Ես սիրիացի եմ և իմ ժողովրդի զավակը»,- ասել է նա՝ ողջունելով ժողովրդին:
Մեծ թվով թիկնապահների ուղեկցությամբ Սիրիայի նախագահը «շնորհակալություն է հայտնել աջակցության և հայրենասիրության համար բոլոր նրանց, ովքեր այսօր փողոց են դուրս եկել»:
Ասադին զորակցության ցույցեր են տեղի ունենում ոչ միայն Դամասկոսում, այլև Սիրիայի այլ քաղաքներում՝ Հալեպում, Լաթաքիայում, Դեյր էլ-Զորում, Դարաայում, Ալ-Սուեյդայում: Երեկ Դամասկոսի համալսարանում Ասադի ելույթից հետո Սիրիայի տարբեր քաղաքներում բազմաթիվ ցույցեր են տեղի ունեցել՝ ի զորակցության «անկախ արտաքին քաղաքական կուրս վարող և բարեփոխումների ծրագիր անցկացնող» Ասադի:
2011 թ. մարտից Սիրիայում սկսված հակակառավարական ցույցերից հետո Բաշար Ալ-Ասադը հազվադեպ է երևում հանրային վայրերում: Անմիջապես ժողովրդի շրջապատում նա առաջին անգամ է երևում:
Հիշեցնենք, երեկ Դամասկոսի համալսարանում Սիրիայի նախագահն ուղերձով դիմեց ժողովրդին՝ մեղադրելով արտաքին ուժերին իրենց դեմ դավադրություն կազմակերպելու մեջ, և խոստացավ արժանի հարված տալ ահաբեկիչներին:
