Փոխվարչապետ, տարածքային կառավարման նախարար Արմեն Գևորգյանն այսօր այցելել է Հայաստանի ազգային արխիվ և անցյալ տարվա ընթացքում կատարված աշխատանքներին ծանոթանալու նպատակով շրջայց կատարել մասնաշենքերում:
Ինչպես «Առաջին լրատվական»-ին տեղեկացնում է ՏԿՆ հասարակայնության հետ կապերի բաժինը, Ազգային արխիվի տնօրեն Ամատունի Վիրաբյանի ուղեկցությամբ փոխվարչապետը նախ` եղել է Մ. Բաղրամյան պողոտայում գտնվող 2-րդ մասնաշենքում, որտեղ 2011թ. շահագործման է հանձնվել տեղային նշանակության կաթսայատունը` արխիվապահոցների ջերմախոնավային կայուն ռեժիմի ապահովման նպատակով:
Կենտրոնական մասնաշենքում Ա. Գևորգյանին են ներկայացվել 2011թ. ընթացքում ձեռք բերված թվայնացնող գերհզոր սարքերը, որոնք հնարավորություն են տալիս արագացնել փաստաթղթերի թվայնացման գործընթացը:
Տեղեկացվել է, որ եթե 2003-2010թթ. թվայնացվել էր ընդամենը 10 հազար էջ թղթե կրիչով փաստաթուղթ, ապա 2011թ. մայիսից, սարքերի ձեռքբերումից հետո` 50 հազար 370 էջ:
Շրջայցին հաջորդած խորհրդակցության ընթացքում ներկայացվել են 2011թ. կատարված աշխատանքները և 2012-ի անելիքները: Նշվել է, որ 2012թ. հունվարի 1-ի դրությամբ արխիվում առկա է 6 291 ֆոնդ` 4 025 784 արխիվային գործով, այդ թվում` 225 554 պահպանման միավոր արխիվային կինոֆոտոֆոնո փաստաթուղթ:
2011թ. թվայնացվել է նաև 1220 պահպանման միավոր արխիվային կինոֆոտոֆոնո փաստաթուղթ, դրանց թվայնացման գործընթացը կավարտվի 2013թ. վերջին:
2011թ. արխիվային պահպանության է ընդունվել 26136 գործավարական, 15 530 անձնակազմին վերաբերող, 8208 երկարաժամկետ պահպանման և 3029 անձնական ծագում ունեցող գործ: Պատասխանվել է քաղաքացիներից (այդ թվում` արտասահմանից) ստացված մոտ 24 հազար սոցիալ-իրավական բնույթի հարցման: Հարցումների 93 տոկոսին դրական պատասխան է տրվել: Անցած տարի արխիվն ունեցել է 485 ուսումնասիրող` նախորդ տարվա 418-ի փոխարեն: Ուսումնասիրությունները հիմնականում եղել են հայրենագիտության թեմաներով:
Տարվա ընթացքում կազմակերպվել է արխիվային փաստաթղթերի 14 թեմատիկ ցուցահանդես, այդ թվում` արխիվի 10 մարզային մասնաճյուղերի կողմից մարզկենտրոններում բացվել են ցուցահանդեսներ` նվիրված տեղական ինքնակառավարման համակարգի հիմնադրման 15- ամյակին:
Հայաստանի պատմության թանգարանի հետ համատեղ կազմակերպվել է Հայաստանի անկախության 20-ամյակին նվիրված «Հայաստանի երեք հանրապետությունները» խորագրով մշտական ցուցահանդեսը: Լույս է տեսել փաստաթղթերի և նյութերի 5 ժողովածու և մեկ պատկերագիրք:
Աշխատանքներ են իրականացվել նաև միջազգային համագործակցության զարգացման ուղղությամբ: Մասնավորապես` Վրաստանի և Ֆինլանդիայի ազգային արխիվների հետ կնքվել են համագործակցության պայմանագրեր: Ուկրաինայի և Ռուսաստանի արխիվների հետ ձեռք բերված պայմանավորվածության համաձայն` 2012թ. կկազմակերպվեն «Հայերը Ղրիմում» և «Հայերը Մոսկվայում» թեմաներով ցուցահանդեսներ Հայաստանում ու համապատասխանաբար այդ երկրներում:
Տեղեկացվել է, որ Հայոց ցեղասպանության 100-րդ տարելիցին ընդառաջ` 2012 թ. կհրատարակվի «Վշտապատում» եռահատոր փաստաթղթերի ժողովածուն, որը 2013-2015 թթ. կտպագրվի անգլերեն, ռուսերեն և թուրքերեն: Նախատեսվում է ստեղծել ցեղասպանության զոհերի վերաբերյալ արխիվի փաստաթղթերի և նյութերի էլեկտրոնային շտեմարան:
Կկազմակերպվեն հայ գրատպության 500-ամյակին, ՀՀ բանակի կազմավորման 20-ամյակին նվիրված ցուցահանդեսներ, մասնավորապես «Հայ զինվորականը» խորագրով շարժական ցուցահանդեսը կներկայացվի ՀՀ բանակի զորամասերում:
Շարունակվելու են փաստաթղթերի թվայնացման, արխիվապահոցների վերազինման, համացանցով քաղաքացիներին մատուցվող ծառայությունների ընդլայնման աշխատանքները:
Փոխվարչապետը հույս է հայտնել, որ ընթացիկ տարում ևս Ազգային արխիվը պատշաճ կերպով կիրականացնի ծրագրված աշխատանքները: Նա կարևորել է աշխատանքների` ժամանակի և կառույցին առաջադրվող պահանջներին համապատասխան կազմակերպումը:
