2012 թ. օգոստոսին Գիզայում, եգիպտական բուրգերի մոտ բացվելու է աշխարհում խոշորագույն եգիպտական մշակույթի թանգարան:
Ինչպես հայտնում է РИА Новости-ն, հունվարի 10-ին Կահիրեում ստորագրվել է Եգիպտական մեծ թանգարանի շինարարության վերջնական` երրորդ փուլի մասին պայմանագիրը: Շինարարությունն իրականացնելու են եգիպտական խոշորագույն Orascom և բելգիական Besix շինարարական ընկերությունները:
Միայն երրորդ փուլի շինարարության համար ծախսվելու է 5 միլիարդ եգիպտական ֆունտ (830 միլիոն դոլար): Ճապոնիան տրամադրելու է 300 միլիոն արտոնյալ վարկ, իսկ եգիպտական կողմը` 150 միլիոն: Վարկի մարումը կսկսվի թանգարանի բացումից տասը տարի անց` թանգարանի եկամուտների հաշվին:
Ինչպես մամլո ասուլիսի ժամանակ հայտնել է Եգիպտոսի հնությունների հարցերով նախարար Մուհամեդ Իբրահիմը, շինարարության երրորդ փուլը տևելու է 40 ամիս, որի ընթացքում կառուցվելու է համալիրի 108 հազար քառակուսի մետր մակերեսով տարածքը: Ընդհանուր առմամբ, թանգարանային համալիրը տեղակայվելու է 480 քառակուսի մետրի վրա: Պարբերաբար ցուցադրվելու են 100 հազար ցուցանմուշներ, որոնք վերաբերում են եգիպտական պատմության տարբեր դարաշրջաններին:
Բացի հիմնական շենքից, թանգարանում նախատեսված է ստեղծել կինոթատրոն, գրադարան, լսարաններ, կոնֆերանսների համար սրահներ, երեխաների, սահմանափակ հնարավորություն ունեցող մարդկանց համար թանգարան, զվարճանքների կենտրոն, ցուցասրահ` ժամանակավոր ցուցադրությունների համար և զբոսայգիներ:
Զբոսաշրջիկների հարմարավետության համար թանգարանային համալիրը Գիզայի բուրգերին է միանալու հատուկ ճանապարհով:
Եգիպտոսի իշխանությունները հույս ունեն, որ Եգիպտական մեծ թանգարանը բացումից հինգ տարի հետո ամեն տարի ընդունելու է ութ միլիոն այցելուի: Սրա հետ կապված անհրաժեշտություն կառաջանա զբոսաշրջիկների համար նոր խանութներ բացել, կառուցել 40 նոր հյուրանոց: «Այն ապահովելու է 60 հազար նոր աշխատատեղ»,- ասվում է Եգիպտոսի իշխանությունների հայտարարության մեջ:
Թահրիր հրապարակում գտնվող Կահիրեի թանգարանն արդեն չի տեղավորում եգիպտական մշակույթի բոլոր հուշարձանները: Սրանց մեծ մասը ժամանակի ընթացքում տեղափոխվելու են Եգիպտական մեծ թանգարան:
Եգիպտոսի հնությունների հարցերով նախարարը հայտարարել է, որ Թութանհամոն փարավոնի դամբարանի գանձերի սրահը նոր թանգարանում նախորդի համեմատ ունենալու է յոթ անգամ մեծ տարածք:
