Նոր հետազոտության արդյունքում պարզվել է, որ երբ մարդիկ ասում են, թե զուգընկերոջ մեջ չկա այն, ինչ իրենք փնտրում են, ի նկատի ունեն սեքսուալությունը։
Ըստ Live Science-ի՝ որքան էլ մարդիկ միշտ ասում են, որ փնտրում են մեկին, ով կլինի խելացի, ում կարելի կլինի վստահել և ում հետ հնարավոր կլինի անընդհատ ծիծաղել, միևնույն է` մարդիկ անգիտակցաբար այդ ամենից առավել ցանկություն ունեն գտնելու հմայիչ և գրավիչ զուգընկերոջ: Սա վերաբերում է և՛ կանանց, և՛ տղամարդկանց` միևնույն չափով:
Northwestern համալսարանի գիտնականները հայտնում են, որ հատուկ ուսումնասիրության միջոցով կարողացել են պարզել, թե անգիտակցական մակարդակում որքան կարևոր է ֆիզիկական գրավչությունը զուգընկեր փնտրելիս:
Հետազոտությունն իրականացնող գիտնականներից Էլի Ֆինկելն ասել է, որ մարդիկ պատրաստ են երկար պատմել, թե ինչ են փնտրում զուգընկերոջ մեջ, սակայն ուսումնասիրությունները ցույց են տալիս, որ երբ հանդիպում են այն մարդուն, ում նկարագրում էին, իրականում հասկանում են, որ դա չէր իրենց փնտրածը:
Հետազոտության ընթացքում ուսանողներին խնդրել են համակարգչային թեստի միջոցով էկրանին հայտնված բառերից ընրել այն բառերը, որոնք կապված են դրական զգացմունքների հետ: Կախված նրանից, թե որքան շատ էին մասնակիցները կարևորում ֆիզիկական գրավչությունը, կարելի է ենթադրել, որ նրանք ավելի շատ ընտրում էին սեքսուալությունը բնութագրող բառերը:
Այս միջոցով հետազոտողները պարզել են, որ մասնակիցների նախնական պատասխանները զուգընկերների ցանկալի հատկանիշների մասին, և համակարգչային թեստի ընթացքում արագորեն ընտրված բառերը չեն համընկնում միմյանց հետ: Արդյունքում պարզվել է, որ ուսանողների մեծամասնությունը չափազանց մեծ տեղ է տալիս ֆիզիկական գրավչությանը:
Հետազոտությունը հրապարակվել է Journal of Personality and Social Psychology ամսագրում:
