Ամերիկյան ABC News հեռուստաալիքի կայքում հոդվածագիր Օլիվիա Քարթանդջյանն առաջարկում է աշխարհի 7 ամենադիտարժան վայրերը, որտեղ արժե այցելել 2012 թ.: Այդ վայրերի ցուցակում Լաոսի, Չիլիի, Պորտուգալիայի, Ավստրալիայի, Թաիլանդի և Նիդեռլանդների կողքին նշվում է Լեռնային Ղարաբաղը:
«Եթե դուք արկած եք փնտրում, այցելեք Հայաստանի և Ադրբեջանի միջև ընկած ցամաքով շրջապատված այդ ինքանավար շրջանը»,- գրում է հոդվածագիրը և բացատրում, թե ինչպես կարելի է մուտք գործել այդ երկիր: «Մնացեք մայրաքաղաք Ստեփանակերտի նորակառույց Armenia Hotel հյուրանոցում, օգտագործեք քաղաքը՝ տարածաշրջանը բացահայտելու համար: Բարձրացեք ձյունածածկ լեռները և զբոսնեք դեղին և կարմիր ծաղիկներով դաշտերում: Ճաշակեք քաբաբ և խորոված բանջարեղեն: Եթե դուք որոշել եք մնալ տեղի բնակիչների մոտ, մի զարմացեք, եթե ձեզ նախաճաշին առաջարկեն տնական թորած օղի»:
Վերջում հոդվածագիրը խորհուրդ է տալիս չմոռանալ այցելել 10-րդ դարում կառուցված Գանձասար վանքը: «Գնացեք այնտեղ գիշերը, որպեսզի տեսնեք այն մթության մեջ լուսավորված»,- եզրափակում է նա:
