«Շտապբուժօգնություն» ծառայությունից օգտվողների թիվը կտրուկ ավելացել է: Այս մասին «Առաջին լրատվական»-ի հետ զրույցում տեղեկացրեց «Շտապբուժօգնություն» ծառայության տնօրեն Թագուհի Ստեփանյանը` անդրադառնալով ամանորյա տոներին ծառայության պահանջարկին: Ըստ նրա` Երևանում գրանցվել է 1447 կանչ:
«Ամսի 1-ին Երևանում գրանցվել է 725 կանչ, իսկ երկուսին` 722: Կանչերն այս տարի գերազանցել են բոլոր ցուցանիշները»,- նշեց Թ. Ստեփանյանը` հավելելով, որ գերազանցում է և՛ նախորդ տարվա ցուցանիշը, և՛ սովորական օրերին ծառայության պահաջարկի ցուցանիշը: «Շտապբուժօգնություն» ծառայության տնօրենը փաստեց, որ 2011 թ. ընթացքում ծառայությունը ամեն օր սպասարկել է 480-520 կանչ, տոնական օրերին գրանցված 700-ից ավելի կանչերը նույպես հասցրել է, բայց փոքր-ինչ դժվարությամբ:
Այն հարցին, թե տոնական օրերին քաղաքացիներն ի՞նչ գանգատներով են դիմում «Շտապբուժօգնություն» ծառայությանը, Թ. Ստեփանյանը պատասխանեց, որ սրտանոթային հիվանդություններով տառապողներն են շատ դիմել: «Այս օրերին եղել են նաև զարկերակային ճնշման տատանումներով, սրտային նոպաներով, տրավմաներով և ջերմությամբ հիվանդներ»,- ասաց «Շտապբուժօգնություն» ծառայության տնօրեն Թագուհի Ստեփանյանը:
