Ռուսական ВЗГЛЯД թերթի փոխանցմամբ՝ Վրաստանի ընդդիմադիր «Ազատ դեմոկրատներ» կուսակցության առաջնորդ Իրակլի Ալասանիան հայտարարել է, որ այս տարի Վրաստանում կայանալիք խորհրդարանական ընտրություններում անխուսափելի է իշխող «Միասնական ազգային շարժում» կուսակցության պարտությունը.
«Վրացական քաղաքական դաշտում ընդդիմադիր միլիարդատեր Բիձինա Իվանիշվիլիի ի հայտ գալը հանգեցրել է տեկտոնական փոփոխությունների։ Նախագահ Միխեիլ Սաակաշվիլին ու նրա կուսակցությունը մեծապես վախեցած են, քանի որ տեսնում են, որ առաջիկա ընտրություններում անխուսափելի է իրենց պարտությունը։
Միջազգային կազմակերպությունների ներկայացուցիչների միջև գոյություն ունի «սկզբունքային համաձայնություն», ըստ որի՝ նրանք ընտրություններին հետևելու են ոչ միայն քվեարկության օրը, այլև դրանից որոշակի ժամանակ առաջ, որպեսզի նախընտրական կամպանիան անցնի արդար։ Միջազգային հանրությունը չի հանդուրժի Վրաստանում ընտրությունների կեղծումը։
Վրացական ընդդիմությունը հուսով է, որ ընտրությունների մասնակցության ցուցանիշը բարձր կլինի՝ 75-80 տոկոս, ինչը նրան հնարավորություն կընձեռի ստանալու ավելի շատ քվեներ։ Բիձինա Իվանիշվիլին իր կուսակցությունը կհիմնադրի փետրվարի սկզբին, որից հետո մեր և հանրապետականների հետ կձևավորի կոալիցիա»։
